Shillong, Jymmang 19: Ka samla Rifiness Warjri kaba dang 20 snem ka rta kaba dei ka dkhot jong ka NCC na St. Anthony’s College na ka kynhun 61 Meghalaya Girls Battalion NCC, kala kiew ia u syntai lum Mangkashang kaba ka pyrthei ka tip kum Mount Everest.
Ia ka samla Rifiness la jied ban ia leit kiew sha u lum Mangkashang ban mih khmat ia ka thian shatei lam mihngi jong ka Ri India ia kaba la tip kum ka “ The NCC Mount Everest Expedition 2025” kane ka samla ka dei kawei na ki 38 ngut kiba la shah jied ha ka kynhun ban kiew sha syntai lum 8849 meter ka jingjrong.
Kane ka kynhun kiew lum jong ka NCC kala poi sha kliar jong u lum Mangkashang ha ka 18/Jymmang/ 2025 ha ka por 0445 kynta. Ka Rifiness Warjri kala wan rah ka burom ia ka jylla Meghalaya ban poi sha kane ka thong.
Ka samla Rifiness Warjri kala dei ka kynthei kaba ar na Meghalaya ban kiew sha kliar lum Mangkashang, kaba nyngkong ka dei ka kong Wansuk Myrthong kaba dei na ka tnad pulti jong ka jylla Meghalaya ha u snem 2013 bad ka GCI Dolyne Kharbhih, na ka 61 Meghalaya Girls NCC Battalion kaba dei ka NCC cadet, ba rim na Ri Bhoi district kala kiew sha kliar lum ha u snem 2016.
Ka samla Rifiness Warjri kala kiew ia u lum Mount Abi Gamin ba jrong 7,355-meter ha Uttarakhand ha u bnai Nailar jong u snem 2024. Ha ka jinglong khynnah kala sah ha Jylli Shop shuwa ban leit sah sha Kynton-U-Mon Laitkor ka dei ka khun balai na ki san ngut shipara jong u bah Shlurbor Kharmyndai bad ka kong Smti Diamondsea Warjri.
Ia ka jinglah ban kiew lum jong ka la iohi naduh ba ka dang pule ha Auxilium Convent Shillong kum kawei na ki dkhot jong ka NCC, ka jingiashim bynta jong ka ha ki kam ialehkai bad ka jingthrang ban kiew lum bad kane ka la pynlong ia ka ba kan poi sha kane ka jingkiew ban kiew ia u syntai lum ba jrong tam ha pyrthei u lum Mangkashang, kaba la tip ha ka ktien phareng ‘Mount Everest’.
