Shillong, Jymmang 31: Ka National Career Service Centre for SC bad STs, Jowai, kaba treikam hapoh ka Tnad Labour & Employment (Directorate General of Employment), Sorkar India, ka sngewkmen ban pynbna ba la sdang ïa ki prokram Stipendiary Training ba shi snem ba ioh ei na ka bynta ki Scheduled Caste (SC) bad Scheduled Tribe (ST).
Kine ki prokram ki long ban pynkhreh ia ki kandidet na ka bynta ki eksamin ban ioh kam na ka bynta ki kam clerical-grade ba la pynlong da ki tnad pynrung kam bapher bapher. Kane ka jinghikai kan sdang naduh ka 1 tarik Naitung 2025.
Ka Centre kan ai lai tylli ki prokram ai jinghikai bapher bapher: Ka jinghikai ba kyrpang ha Shorthand kaba shisnem, ka jinghikai ‘O’ Level Computer kaba shisnem, bad ka jinghikai Computer Hardware Maintenance (CHM).
Baroh ki jinghikai kilong kiba khlem jingsiew, bad uwei pa uwei u kandidet ba shah jied un ioh ia ka stipend kaba T.1000/- man u bnai ryngkat bad ki tiar pule ba ioh eina ka bynta ka samoi baroh jong ka jinghikai.
Ban ioh ia kane, ki nongaplai ki dei ban long na ka jaidbynriew SC/ST, ki dei ban don ia ka jingpynrung kyrteng ha ka Employment Exchange, bad ki dei ban don ia ka jingnang jingstad kaba duna eh kaba long Higher Secondary (+2) pass lane shaneng.
Ka rta jong ki nongaplai ka dei ban long hapdeng 18 bad 30 snem katkum ka 1 tarik Naitung 2025, bad ka jingkamai jong ka longïing jong ki ha ka shisnem kam dei ban palat ïa ka T. 3,00,000.
Ki kandidet kiba don jingthmu ki lah ban applaiia ki prokram ai jinghikai ha lane shwa ka 15 tarik Jylliew 2025. Lah ban thep online ia ki aplikeshon lyngba ka rynsan National Career Service ha ka www.ncs.gov.in lane offline da kaba lum bad phah ia ka phom khlem jingsiew na ka Centre ha ki por treikam hapdeng ka por 10:00 Mynstep haduh 5:00 Janmiet.
La shah ia ki nongaplai ban jiedkatkum ka jingkwah jong ki, hynrei yn ai tang ia kawei ka course katkum ka jingbit jingbiang jong ki nongaplai bad ka jingdon jong ki jingai jinghikai.
Haba aiti ia ka aplikeshon, ki kandidet ki dei ban ai lang ia ki photocopy ba la pynshisha hi dalade jong baroh ki kot ki sla ba donkam kynthup ia ki syrnot jong ka kyrdan pule bad ki mark sheet. ka caste certificate, ka Aadhar card, ka syrnot pynshisha ia ka jingioh (kaba pyni ia ka jingioh kaba hapoh T. 3 lak ha ka shisnem), bad ka kot pynrung kyrteng kaba dang treikam ha ka Employment Exchange.
Ka long kaba donkam ban tip ba yn nym ai TA/DA ia ki kandidet ban leit thoh ia ka written test lane ka jingpynshisha ia ki kot ki sla. Na ka bynta ki jingtip ba bniah bad ki jingkylli, ki kandidet ki lah ban leit sha ka Centre lane sha ka ophis ha ki por trei.
