Shillong, Nohprah 17: Ka jingbthah ka tnad sam bam ba baroh kiba don ia ki kard ration ki hap ban leh ia ka e-KYC da kaba pyniasoh lang ia ka Aadhaar kard jong baroh kiba don kyrteng ha ka kard ration bad kane ka la kut ha ka 30 tarik Naiwieng 2025 ha dien katei la pynmih hukum biang ba yn bteng biang ia ka jingleh e-KYC haduh ka 20 tarik Nohprah 2025.
Kumba ka long mynta kito kiba khlem pat leh ia ka e-KYC ki dukan ration kim ai khaw shuh wat la ki don ia ka kard ration, ban ioh khaw biang ki dei ban leh ia ka e-KYC, ka jingsam ia khaw ration ha ki dukan bapher bapher ka dang iaid bad kito kiba khlem leh ia ka e-KYC kim lah ban shim ia u khaw, kane kala buh ha ka umdum ia ki paidbah.
Na ka liang jong u SP News Agency la leit sha ka tnad sam bam sam dih ban kynduh ia ka director ka Saloni Verma IAS ban ioh ia ka jingpynshai halor ka e-KYC ,ha ka sien leit kaba nyngkong hadien ba kala phah ap katto katne por ka la bthah ban phah da ka jingthoh ia ki jingkylli bad la leh kumba la bthah.
Hadien ba la ioh ia ka jingthoh lyngba ka WhatsApp la bthah ban ia kynduh mynta ka sngi, haba la leit sha ophis kaba don ha horseshoe building ha Lachumiere ha bala ia kynduh ha kamra trei kam kala aidaw ba ka bunkam bad ka la ong ruh to ap shuwa bad ka khlem jubab ia ki jingkylli kiba la dep phah sha ka.
Kane ka jingbymioh jingshai haba ia dei bad ka e-KYC kala buh ia ki paidbah ha ka lyngngoh namar kito ki bym pat leh ia ka e-KYC kim ioh khaw shuh, ki paidbah ki kwah ban ioh ia ka jingpynshai na ka sorkar ha kaba ia dei bad kane.
