Shillong, Nohprah 17: Ka Meghalaya ka la buh ia ka thong kaba long 248 ron ia ka Mizoram ba kan jop ia ka jingiakhun ka lympung ialehkai -19 Men’s Cooch Behar Trophy, kaba la long ha Anand, Gujarat.
Haba wan ban bteng ia ka pali wan tied ba nyngkong kaba long 129 ron naka bynta 5 wiket, ka Mizoram ka la lap ba hap noh ki wiket ba sah ki jong ka hadien ba ka la lah ba kan kamai tang 177 ron, kaba wan hadien ba ka Meghalaya ha ka pali ba nyngkong ka jong ka, ka la lah ba kan kamai 219 ron.
Na ka liang u Malsawmmuanzela uba la kamai lypa 32 ron, hynne ka sngi kaba bud, u la lah ban kamai tang shi ron ha shwa ba un out noh ha u Angkit Tamang (2/14), hadien kane u Eric u la ieng iakhun da kaba u la lah ban kamai 22 ron, hynrei um shim la ioh ia ka jingkyrshan na la ki paralok, kaba pynlong ia ki ban duna da kumba 42 ia ka ron ba la lah ban kamai ka Meghalaya ha ka pali ba nyngkong.
Ha kane ka kynti, ka Meghalaya kam shim la pyndonkam pura ia u Namewanki Pakyntein, pynban u dang lah pat ban iai bteng ban bol bha tad haduh ba u la ioh ban khur 3 wiket na bynta 25 ron, ia kaba la bynrap lang da Mewankitbok Kharpuri (2/43), Gaurav Jyoti Thakuria (1/0), Sameer Choudhury (1/12) bad Gaurav Narleng (1/27).
Haba wan ban sdang ia ka pali bet (batting) kaba ar, ka Meghalaya ka la pyrshang ban iakhun kham suki hadien ba u Mannan Surana (27), Sameer (24) bad Dipayan Nandi (57), ki la kamai ia ki ron kiba ka kynhun ka donkam, hynrei ka jingeh ba la ia kynduh pat hangne ka long ba ka Meghalaya kam lah ban ioh ia ka jingkamai ron paralok kaba heh, hadien ba ka la lap ba hap 7 wiket bad ka ron ba la amai ka long tang 148 ron, hynrei shwa ba kiei kiei kin lam sha kaba kham eh, mih madan ka jingkamai ron paraalok ba 40 ron na ka bynta ka wiket ba phra hadpeng u Rudra Singh Rathor (27) bad Heiyoomiki Ryngkhlem (35 not out), ha kaba kane hi ka la pynskhem ia ka Meghalaya bad ba kan lah ban jam biang sa shisien palat ia ka arspah ron
Ka pali wan tied kaba ar ka Meghgalaya ka la kut thik ha ka por ba dei ruh ban pynkut noh ia ka sngi kaba ar jong ka jingiakhun, ha kaba ka Mizoram, kam shim la ioh satia ia ka lad ba kan wan ban beh ia kne ka thong, kaba da kylla, kane ka jingiakhun kan jam pat sha ka sngi kaba lai kaba hangne baroh arkynhun la khmih lynti ba kin ia shat ia la ki jong ki khmat ba kin kthong ia ka nam jong ka jingjop.
