New Delhi, Nohprah 23: Ki Rozgar Sahayak na ki Jylla bapher bapher ki la ïakynduh ïa u Myntri Sorkar Pdeng ba dei peit ïa ki kam pynroi ha ki jaka nongkyndong u Shivraj Singh Chouhan ha ka sngi Nyngkong ha Bhopal bad ki la pynpaw ka jingsngewnguh ïa u ba u la kyntiew ïa ka jingpynlut ha ka liang ka synshar khadar na ka 6% sha ka 9%.
Ha kane ka sngi, u Shivraj Singh Chouhan u la ong ba ka jingpynslem ban siew ia ki tulop ha ka por kaba biang sha ki nongiarap kam, ki panchayat secretary bad ki nongtrei ba dei khmih ia ka kam technical ka la long ka jingeh kaba khraw, bad ba la shim ia ka rai kaba kongsan ban kyntiew ia ka jingpynlut ha ka synshar khadar ban pynbeit ia kane.
U Myntri Sorkar Pdeng u Shivraj Singh Chouhan u la ong ba mynshwa ka jingpynlut ha ka synshar khadar ka long 6%, ia kaba mynta la kyntiew sha ka 9%, kata la pynkiew shi shah shiteng. Ka jingmyntoi beit beit na kane kan long ba, na ka mang tyngka baroh kaba la tyrwa kaba long T.1,51,282 klur, palat T.13,000 klur yn mang na ka bynta ki tulop jong ki nongtrei bad ki jingdonkam ha kaba iadei bad ka jingpyniaid ia ki synshar khadar.
U Myntri Sorkar Pdeng u la ong ba kane ka pisa kan biang ban pyndap ia ka jingsiew tulop jong ki nongtrei bad yn pynthikna ba kan ym don kano kano ka jingpynlut kai ha kano kano ka jait ha ka jingpynlut ha ka synshar khadar. U Shivraj Singh u la ong ba kan don ka jingpeitngor kaba pyrkhing ban iada na ka jingpynlut ha ki jeep, ki kali ne kiwei kiwei ki bym donkam.
U la ong ba ki Rozgar Sahayak ki la pynpaw ia ki jingeh jong ka jingpynslem bad ka jingpynsah ia ki tulop, hadien kata la buh ia ki jingdonkam ha ki kyndon ba dei ban siew shwa ia ki tulop bad kiwei kiwei ki jinglut kiba kongsan tang hadien kata. Na ka bynta kane, yn pynmih ia ki jingbthah kiba donkam ha ka jingiatreilang bad ki Jylla.
U Myntri Sorkar Pdeng ba dei khmih ia ki kam pynroi ha ki jaka nongkyndong u Shivraj Singh Chouhan u la ong ba ym kumba long hapoh ka MGNREGA, mynta ka la don ka jingpynthikna katkum ka ain ban ioh kam 125 sngi ha ka jaka 100 sngi.
Ha kajuh ka por, da kaba buh ha ka jingmut ia ka aiom rep, la ai bor ia ki sorkar jylla ban pynmih ia ki jingpynbna kiba ailad ia ki nongtrei ban trei ha ki kam rep haduh 60 sngi ha ka por bet bad por ot, khnang ba ki nongrep kin ym hap ban mad ia ka jingduna nongtrei. U Shivraj Singh Chouhan u la ong ba la pyrshang ban pynlong ia ka skhim VB-G RAM G kaba kham treikam bha da kaba weng noh ia ki jingduna kiba rim.
Da kaba kyntiew ia ka jingpynlut ha ka liangka synshar khadar, la shim ia ka sienjam kaba skhem ban pynduna ia ka jingeh jong ki paralok kiba trei ha ki jaka nongkyndong. U Shivraj Singh u la ïathuh ruh ha ki nongïarap ha ka liang ka kam ba ïa kane ka khubor dei ban pynpoi sha baroh bad u la pynthikna ïa ki ba, hadien ba la ïakren ïa ki jingai jingmut jong ki bad ki Sorkar Jylla, yn dang pynbha shuh shuh khnang ba ki nongtrei kiba trei ha ki panchyat.
U Myntri u la ong ba ka ‘Viksit Bharat-G RAM G’ ka dei ka skhim kaba kongsan, kaba mynta kam dei shuh tang ka bill bad ka la kylla long kum ka Aain hadien ka jingmynjur jong ka President. U Shivraj Singh Chouhan u la ong ba don ki briew kiba pyrshang ban wanrah jingkulmar halor kane ka skhim, hynrei ka long kaba donkam ban sngewthuh ia ka jingshisha bad ban pynthikna ba ki jingtip kiba dei kin poi sha man la ki shnong.
U Shivraj Singh Chouhan u la ong ba hapoh ka MGNREGA kham mynshwa ka la don ka jingpynthikna ban ioh kam 100 sngi, ia kaba la pynkiew sha ka 125 sngi hapoh ka ‘Viksit Bharat Rozgar Yojana’. U la ong ba kane kam dei tang ka jingpynbun sngi, hynrei ka jingpynkhlain shuh shuh ia ka jingkpynthikna ban ioh kam ioh jam. Lada na kano kano ka daw ym shym la ai kam, ka kyndon ban ai bai bylla khlem kam kaba kham khlain ban ia kaba mynshuwa.
U la ong ba la buh ruh ia ki kyndon kiba pyrkhing ha kaba iadei bad ka jingsiew ia ka bai bylla. Lada ym siew ia ka bainong hapoh 15 sngi bad ka pisa ka dang sahteng, u nongtrei un ioh shuh shuh ka jingsiew bai lutksan. Kan ym long shuh kaba lah ban pdiang ba ka jingsiew kan sahkut da ki bnai. La pynthikna ban siew ia ka bai bylla ha ka por kaba biang. Ki dor jingsiew kiba mynta kin dang iai bteng bad ki bai bylla kin nang kiew man la u snem.
U Myntri Sorkar Pdeng u la ong ba hapoh kane ka skhim yn shim ia saw jait ki jingtrei. Ka thup kaba nyngkong ka kynthup ia ki kam kiba iadei bad ka jingpynneh pynsah ia ka um bad ka jingtyngkai ia ka um, kum ki pung, ki check dam bad kiwei kiwei ki jingtei.
Ka thup kaba ar ka kynthup ia ki jingtrei haduh ki jingdon jingem ba kongsan jong ka shnong kum ki skul, ki hospital, ki Anganwadi centre, ki surok, ki nala um bad kiwei kiwei ki jingdonkam kiba yn sa pyntreikam. Yn kynthup ia ki jingdon jingem ba kongsan na ka bynta ki kynthei kiba iadei bad kam kamai jakpoh bad na ka bynta ki FPO.
Ka thup kaba lai jong ki kam kan long ki kam kiba iadei bad ka kamai kajih kiba iarap ban pyniar ia ka lad ioh kam, katba kaba saw kan kynthup ia ki kam kiba iadei bad ka jingiada na ki jingshah ha ka jingpynjulor ki bor ka mariang, kum ki kynroh, ki lynti pyntuid um bad ki jingtei kiba pyniasoh ia ki wah bad ki wahduid.
U Shivraj Singh Chouhan u la ong ba ka dei ka jingthmu jong u Myntri Rangbahduh ka ri u Narendra Modi ba ki kam pynroi ki dei ban paw. Hapoh ka Viksit Gram Panchayat Yojana yn pynkhreh ia baroh ki jingthmu lyngba ka jingïamir jingmut lang bad ka shnong hi kan sa rai ïa ka lynti jong ka roi ka par jong ka.
