New Delhi, Nohprah 30: U Myntri kam pohiing jong ka sorkar pdeng uba dei ruh u Myntri ka Tnad treilang u Amit Shah mynta ka sngi u la plie ia ka Jyoti–Vishnu International Art Centre ha Guwahati, Assam. U la plie ruh ïa ka jaka treikam jong u Police Commissioner kaba la shna thymmai, ka Command and Control Centre, bad ka wxhibiation ha ka jylla shaphang ki lai tylli ki aiñ kiba iadei bad ki kam beiñ kiba thymmai. Ha kane ka sngi la don lang u Myntri Rangbah ka jylla Assam u Dr. Himanta Biswa Sarma, u Myntri ka sorkar Pdeng u Sarbananda Sonowal, bad kiwei kiwei ki kynrem ki lyndan.
Ha ka jingkren jong u, u Myntri kam pohiing jong ka sorkar pdeng bad u Myntri ka Tnad treilang u Amit Shah u la ong ba ha kawei ka sngi mynta ka sngi, la pynlong ia katto katne ki prokram ha Assam kiba kynthup ia baroh ki bynta jong ka roi ka par, ka jinglong kyrpang, ka kolshor, bad ka jingshngain.
U la ïathuh ruh ba ïa ka jaka treikam jong u Police Commissioner ba la shna thymmai, ba la tei ha ka jinglut kaba T 111 klur, la plie paidbah mynta ka sngi bad ba ym tang ba ka long kaba thymmai hynrei kaba biang bha ha kaba iadei bad ki jingdonkam kiba mynta. U la ïathuh ba ïa ka Integrated Command and Control Centre, kaba la shna ha ka jinglut kaba T 178 klur bad kaba thmu ban pynkylla ïa ka jingmut jong ka smart policing sha ka jingshisha, la plie paidbah ruh mynta ka sngi.
U Shah u la ong ba ïa ki lai tylli ki aiñ kiba thymmai kiba iadei bad ki kam beiñ, ki ban pynthikna ïa ka hok ha Assam naduh ka ïingbishar jong ka session’s court haduh ka Supreme Court hapoh lai snem ha kine ki sngi ban wan, la wanrah ruh lyngba ka exhibition.
U Amit Shah u la iathuh ba kham mynstep mynta ka sngi, la plie ruh ia u mot kynmaw burom ia u Srimanta Sankardeva ha Nagaon. U la ong ba ka jingtehlakam ia ki jingklun jaka da ki nongwan rung tuh na ka jaka kaba heh 162 akar bad ka jingshna ia u mot kynmaw ia u Srimanta Sankardeva ka dei ka dak kaba kongsan jong ka jingkyntiew biang ia ka kolshor jong ka Assam.
U la ïathuh ruh ba mynta ka sngi la plie ïa ka Shri Jyoti–Vishnu Auditorium hangne. U la bynrap ruh ba ka jingplie ïa kane ka jaka ïalang, kaba la tei ha ka jinglut kaba kumba T 291 klur kum ka jingkynmaw ïa ki arngut ki nongthoh kot bad ki nongdro ba khraw—u Jyoti Prasad Agarwala bad u Bishnu Prasad Rabha bad kaba lah ban shong haduh 5,000 ngut ki briew, ka long ka dak ka jingkiew shaphrang jong ka Assam’.
U myntri kam pohiing ka sorkar pdeng u la ong ba wat lada kren katno katno ruh shaphang u Jyoti Prasad Agarwala bad u nongsaindur ba khraw u Bishnu Prasad Rabha kan nym biang satia. U la ong ba u Agarwala u la shna ia ka phlim ba nyngkong jong ka Assam, ka Joymoti, ha kaba u la buh ia ka nongrim jong ka kam shna phlim Assam.
U Shah u la ong ba u Agarwala u la trei ruh ban pynmeh ding ia ka jingthrang ban ioh ia ka jinglaitluid hapdeng ki briew jong ka Assam da kaba pyniadei ia ka jingrwai, ka jinglehkai, bad ka thoh ka tar bad ka jingieit ri. U la ong ba kane ka la wanrah ia ka jingburom ialade bad ka jingieit ri ha ki dohnud jong ki briew jong ka Assam, ia kaba hadien la rah shakhmat da u Gopinath Bordoloi lyngba ka jingkhih kaba jur kaba la pynbor ia u Myntri Rangbahduh ba nyngkong ban pynthikna ba ka Assam kan long ka bynta jong ka ri India.
U Amit Shah u la ong ba u riewkhraw ha ka kam saindur u Bishnu Prasad Rabha u la pynkhlain ia ka jingiakhih na ka bynta ka jinglaitluid lyngba ka kam saindur. U la ong ba u Rabha u la pyniasoh ia ki briew kiba rit paid ki nongtrei, ki nongrep bad ki riewlum bad ka jingiakhih na ka bynta ka jinglaitluid lyngba ki jingthoh kiba suk ban sngewthuh jong u.
U la bynrap ba u Rabha u la wanrah ia ka jingsngewthuh shaphang ka jingsynshar bakla jong ki nongwei bad ka jingduk, ka jingbym ia ryngkat kyrdan, bad ka jingbym long hok ha ka imlang sahlang kaba mih na kane.
U Myntri ka Tnad kam pohiing jong ka sorkar pdeng uba dei ruh u Myntri ka Tnad treilang u la ong ba ka Assam ka la mih na ka por jong ka jingeh kaba la slem bha. U la ong ba ka Assam shiphew snem mynshwa ka la sakhi ia ki jingbthei bom, ki jingkhang khyrdep, ki jingiasiat, ki kynhun lehnoh, bad ki jingiakhih.
U Myntri kam pohiing u la ong ba hapoh ka jingialam jong u Myntri Rangbahduh ka ri u Narendra Modi ha kine ki 11 snem ba la dep, ka Assam ka la iaid ha ka lynti jong ka roi ka par bad mynta ka iaid shakhmat ryngkat bad ka ri baroh kawei. U la ong ba ki nongwan rung tuh ki la wan ha ki jaka ha kylleng ka Assam, hynrei ha kine ki 10 snem ba la leit noh—khamtam ha kine ki san snem ba khatduh jong ka jingsynshar jong u Dr. Himanta Biswa Sarma – la ioh shim biang haduh 1 lak 29 hajar bigha ka jaka kaba la shah klun tuh.
U Amit Shah u la ong ba kito kiba kren shaphang ka kam saindur, ka thoh ka tar, bad ka kolshor jong ka Assam ki dei kiba la wanrah ia ka ain ha u snem 1983 ban pynsah ia ki nongwan buhai shnong hangne. U la ong ba hadien ka jingwan jong ki nongwan rung beain, ka kam saindur, ka kolshor, ka sur jingrwai, bad ka ktien jong ka Assam kim lah ban iaineh.
U la bynrap ba khnang ban ioh ia ki vote, ka liang pyrshah ka la wanrah ia ka jingartatien halor ka jingneh jong ka Assam hi. U Shah u la ong ba ka sorkar jong ka kynhun sain pyrthei jong u ka la synshar ha Assam ha kine ki 10 snem ba la dep, bad ha ki san snem ban wan kin beh noh ia uwei pa uwei u nongwan rung tuh na Assam. U la ong ba ka dei tang kane ka ban iada ia ka kolshor, ka ktien, bad ka sur jingrwai jong ka Assam.
U Myntri ka Tnad kam Pohiing jong ka Sorkar Pdeng uba dei ruh u Myntri ka Tnad treilang u la ong ba ka sorkar Modi ka la wanrah ia ka shongsuk shongsain ha Assam da kaba rung ha ki jingiateh bad baroh ki kynhun lehnoh ha ka jylla. U la ong ba na ka daw jong kitei ki jingiateh, palat 10,000 ngut ki samla ki la wan pyndem ia ki tiar ialeh bad ki la wanphai biang sha ka imlang sahlang, bad ka Assam mynta ka iaid shakhmat ha ka lynti jong ka roi ka par.
U la ong ba mynta ki karkhana kiba shongdor da ki lak bad ki klur tyngka la seng ha Assam, la kyntiew ia ki jingtei, ka Kaziranga ka la kylla long kawei na ki jaka jngohkai kaba kongsan tam ha ka ri, bad lyngba u mot jong u Lachit Borphukan, la pyrshang ban pynrung ia ki kam jong u ha ki dohnud jong ki samla. U la bynrap ruh ba hadien ka por ba la slem bha, la shna ruh ïa ka jaka sah jingkynmaw kaba biang bha na ka bynta kito kiba la aiti ia la ka jingim ha ka jingiakhih ka Assam, kaba long ka dak jong ka jingai ia ka hok jong ki.
