Shillong, Nohprah 02: Ka Tnad kam ïalehkai, Sorkar Meghalaya ryngkat ka jingïatreilang bad ka My Bharat Kendra, ka la pynlong ïa ka prokram Meet and Greet mynta ka sngi bad ki samla kiba la shah jied ban ïashim bynta ha ka National Youth Festival – Viksit Bharat Young Leaders Dialogue (VBYLD) 2026 ha Lok Bhavan, Governor’s House, Shillong.
Ïa kane ka prokram la plie da u Lat ka jylla Meghalaya, u C. H. Vijayashankar, uba la ïakren bad pynkup burom ïa ki nongïashim bynta kiba la shah jied.
Haba ai jingkren ha ka jingïalang, u Lat ka jylla u C. H. Vijayashankar, u la ai khublei ïa ki samla kiba la shah jied na kylleng ka ri bad kiba mihkhmat ïa ki jingangnud jong ka jylla Meghalaya ha ka Viksit Bharat Young Leaders Dialogue 2026. U la ban jur ba ka jinglong nongialam kam dei tang ka nam ne ka kyrdan, hynrei ka dei ka jingkitkhlieh kaba don tynrai ha ka jinglong, bad ka jingshakri ia ka imlang sahlang.
U Lat u la ban jur ba ka jinglong nongialam ba shisha kam dei shaphang ka bor, hynrei ka dei shaphang ka jingpynkupbor, bad u la kyntu ia ki samla ba kin long kiba don ka jinglong ba ryntih, kiba iaineh bad kiba kut jingmut ha ki thong jong ki. U la kyntu ia ki delegate ban pyndonkam hok ia ka rynsan jong ka ri ban wanrah ia ki jingmut kiba noh synniang ha ka rukom kaba seisoh ia ka jingthmu jong ka Viksit Bharat.
U la ai ruh ia ki nuksa kiba ai mynsiem ia ki samla kiba la jop bad u la iasam ia ka khana shaphang i Kong Rifiness Warjri, ka cadet jong ka NCC na Meghalaya, lyngba ka jingkut jingmut, ka jingngeit bad ka jingiai trei shitom, ka la kiew ïa u lum Everest ha ka rta kaba 20 snem. U la ong ba ka jingjop jong ka, ka pyni kumno ka jingshai jong ka jingthmu, bad ka jingminot ka plie lad ia ki samla ban jop ia ki jingeh bad ban ioh ia ka jingjop kaba phylla.
Ka Jylla Meghalaya ka la ïoh ban mihkhmat ha ka Viksit Bharat – Design for Bharat track, ha kaba arngut ki samla pule na ka National Institute of Technology, Shillong, u Nishant Kumar Singh bad ka Necharika Singh, ki la shah jied ha ka ri baroh kawei. Ka jingsaindur thymmai jong ki, ka Smart Braille Watch, ka dei ka tiar ba lah ban deng ha ka met, kaba la shna khnang ban iarap ia ki briew kiba don jingduna ka bor iohi ban tip ia ka por bad ki jingpynbna lyngba ka tactile Braille output.
Ka projek ka pynleit jingmut sha ka jingjem dor, ka jinglah ban kynriah bad ka jingsuk ban pyndonkam, da kaba pynbeit ia ki jingduna kiba iadei bad ki tiar Braille ba la don lypa. Ki nongsaindur ki don mynta ha New Delhi ban pynkhreh ban pyni ia ka projek jong ki ha ka rynsan jong ka ri ha ka jingiadonlang u Myntri Rangbahduh ka ri u Narendra Modi bad kiwei ki riewshemphang.
Haba ïasam ïa ki jingthrang jong ka, ka Ashita Kar, ka samla kaba pule ha ka klas XI na East Khasi Hills District ka la ong, “Kane kadei ka sien kaba ar jong nga ban ïashim bynta ha ka National Youth Festival kum shi bynta jong ka Viksit Bharat Young Leaders Dialogue. Ngan pyni ia ka jingthmu jong nga halor ka jingtei ia ka kynhun treikam kaba la pynkhreh na ka bynta ka lawei na ka bynta ka Viksit Bharat, bad nga kyrmen ba ia ki jingmut jong ki samla na kylleng ka ri yn pdiang bad pyntreikam na ka bynta ka Viksit Bharat 2047.”
U Akbarlang Synteng Nongdhar na East Khasi Hills District, u ban mihkhmat na ka Meghalaya ha ka thup Folk Dance, u la pynpaw ka jingkmen, da kaba ong, “Nga sngew sarong ban mihkhmat ïa ka Jylla Meghalaya ha ka ri. Kum ki samla, ngi khmih lynti ia ka jingialam lynti bad kiwei kiwei ki lad kiba kum kine ban pyni ia ka kolshor, ka pateng bad ka sap jong ngi ha ka rynsan jong ka ri.”
U Bah Elbonson Marbaniang uba dei u coach ïalehkai phutbol na Mawsynram, East Khasi Hills District u la ong, “Ngin pyni ïa ka shad tynrai ‘Ka Shad Mastieh’ ha New Delhi. Ngi kyrmen ban mihkhmat ïa ka Jylla Meghalaya da ka jingsarong bad ban pyni ïa la ka sap ka phong hakhmat ki delegate na kylleng ka ri.”
La jied haduh 25 ngut ki samla na Meghalaya ban ïashim bynta ha ka Viksit Bharat Young Leaders Dialogue 2026. Ïa ki delegate la jied lyngba ka rukom jied ba bun kyrdan kaba la sdang da ka online quiz ha baroh kawei ka ri kaba la pynlong lyngba ka My Bharat Portal ha u bnai Nailur–Risaw 2025, kaba la sakhi ïa ka jingïashim bynta jan 50 lak ngut ki samla na kylleng ka ri. Na ka jylla Meghalaya ki la don haduh 2,393 ngut ki samla kiba la iashim bynta ha kane ka quiz, ha kaba 475 ngut ki la ioh lad ban iashim bynta ha ka bynta jong ka online essay.
Ki nongiashim bynta kiba la shah jied ki la phah ia ki essay ba la pynshong nongrim ha shiphew tylli ki phang pdeng ba kongsan jong ka Viksit Bharat Challenge. Hadien ka jingjurip jong ki riew shemphang ha kane ka kam katkum ki jingbthah jong ka Tnad kam ialehkai, Sorkar India, 88 ngut ki samla na Meghalaya ki la poi sha ka bynta jong ka State Championship.
Ia kane ka jingiakop hapoh ka jylla la pynlong ha ka 13 tarik u Nohprah 2025, ha kaba ki nongiashim bynta ki la pyni ia ki jingmut jong ki lyngba ki jingpyni PPT hakhmat ka kynhun bishar kaba kynthup ia ki riewshemphang. Ia ka jingjied kaba khatduh ha ka ri la mynjur da u nongpyniaid ba la thung da ka Tnad hadien ka interview.
Nalor kane, ki don 23 ngut ki samla na ka jylla Meghalaya ki ban ïashim bynta ha Cultural Track, ha kaba kin pyni ïa ki jingrwai bad jingshad tynrai, katba lai ngut ki samla kin ïashimbynta ha ka declamation, poetry bad painting. Ia kine ki nongiashim bynta la jied napdeng ki 1,000 ngut ki samla kiba la iashim bynta ha ka State-level Chief Minister’s Youth Engagement Programme kaba la pynlong ha NEHU naduh ka 2 haduh ka 5 tarik u Nohprah 2025.
Ki delegate ba la shah jied kin iakren bad u Myntri Rangbah duh ka ri, u Narendra Modi ha ka 11 tarik Kyllalyngkot 2026 ha ka National Youth Festival.
Ha kane ka prokram la iadonlang u S. P. Singh, State Director, My Bharat Kendra; Bah F. Rummong, Deputy Director bad State NSS Officer; Bah Paia Nongbri, Deputy Director, Tnad kam ialehkai; Kong Darlene Khonglam, Sports Officer, Tnad kam ialehkai; lem bad ki ophisar na ka My Bharat Kendra bad ka Tnad kam ialehkai.
Ka Viksit Bharat Young Leaders Dialogue kadei ka bynta ba kongsan jong ka National Youth Festival 2026 kaba 29, ka ban long ha Bharat Mandapam, New Delhi, naduh ka 9 haduh 12 tarik Kyllalyngkot, 2026. Ka National Youth Festival ka kynthup ia saw tylli ki bynta ba kongsan, ka Viksit Bharat Young Leaders Dialogue, Viksit Bharat Cultural Tracks, Viksit Bharat Design for Bharat, bad ka Viksit Bharat Hack for Social Change.
