New Delhi, Kyllalyngkot 16: U Myntri Rangbah duh ka ri u Narendra Modi un leit jngoh ia ka jylla Assam ha ka 17-18 tarik Kyllalyngkot, 2026.
Ha ka 17 tarik Kyllalyngkot, ha ka por kumba 6 baje janmiet, u Myntri Rangbah duh un iashim bynta ha ka prokram ba iadei bad ka kolshor tynrai jong ki Bodo ha Sarusajai Stadium, Guwahati.
Ha ka 18 tarik Kyllalyngkot, ha ka por kumba 11 baje mynstep, u Myntri Rangbah duh un leh ia ka Bhoomi Pujan na ka bynta ka Kaziranga Elevated Corridor Project, kaba shongdor palat T. 6,950 klur bad un pyllait paidbah ia 2 tylli ki rel Amrit Bharat Express kiba thymmai ha Kaliabor, Nagaon district.
U Myntri Rangbah duh ha Guwahati
U Myntri Rangbahduh un ïashim bynta ha ka “Bagurumba Dwhou 2026”, ka jingialang kaba kongsan ba iadei bad ka kolshor kaba rakhe ïa ka pateng ba riewspah jong ka jaidbynriew Bodo ha madan ialehkai Sarusajai, Guwahati.
Ha kane ka sngi, palat 10,000 ngut ki nongshad na ka jaitbynriew Bodo kin pyni ia ka jingshad Bagurumba. Ki nongshad na 81 tylli ki Constituency na kylleng ki 23 tylli ki district jong ka jylla kin iashim bynta ha kane ka prokram.
Ka Bagurumba kadei kawei na ki jingshad tynrai jong ka jaitbynriew Bodo, kaba la pynshong nongrim ha ka mariang. Ka jingshad ka pyni ia ki syntiew kiba phuh bad ka pyni ia ka jingiadei hapdeng ka jingim jong ki briew bad ka mariang.
Ia kane ka jingshad la pyni da ki kynthei samla Bodo, ryngkat bad ki shynrang kum ki nongtem, ka jingshad kalong kaba jai jai kaba pynbud ia ka rukom khih ki thapbalieh, ki sim, ki sla bad ki syntiew. Ia ki jingshad la ju pynlong ha ki kynhun, kiba shad pyllun pyllun ne ki lain kiba kyntiew ia ka jingitynnad jong ka.
Ka jingshad Bagurumba ka don ka jingmut kaba jylliew ha ka kolshor na ka bynta ki Bodo. Ka pyni ia ka jingsuk, ka jingseisoh, ka jingkmen bad ka jingiatylli lang, bad ka iadei bha bad ki tamasa kum ka Bwisagu, ka Bodo New Year, bad ka Domasi.
U Myntri Rangbahduh un leh ia ka Bhoomi Pujan jong ka Kaziranga Elevated Corridor Project (4-Laning of Kaliabor-Numaligarh section of NH-715), kaba shongdor palat T. 6,950 Klur.
Kane ka projek Kaziranga Elevated Corridor kaba jrong 86 km kadei ka projek jong ka National Highway kaba pyrkhat ia ka mariang. Kan don 35 km ka Elevated Wildlife Corridor ka ban iaid lyngba ka Kaziranga National Park, 21 km ka Bypass section bad 30 km ka jingpynheh ia ka surok bah kaba la don lypa jong ka NH-715 na ka ar sha ka saw lane. Ka projek ka thmu ban kyntiew ïa ka jingïapyniasoh ha ki thaiñ katba ka pynthikna ïa ka jingïada ïa ki jingdon jingem ba riewspah jong ka park.
Kane ka projek kan iaid lyngba ki distrik Nagaon, Karbi Anglong bad Golaghat bad kan kyntiew shibun ia ka jingpyniasoh sha Upper Assam, khamtam sha Dibrugarh bad Tinsukia. Ka elevated wildlife corridor kan pynthikna ia ka iaid ka ieng kaba khlem jingthut na ka bynta ki mrad, kan pynduna ia ka jingiatyngkhuh hapdeng ki briew bad ki mrad khlaw.
Kan kyntiew ruh ia ka jingshngain ha ki surok, kan pynduna ia ka por leit por wan bad ki jingjia aksiden, bad kan kyrshan ia ka jingbun jong ki nongleit nongwan bad ka jngkit ia ki mar. Kum shi bynta jong kane ka projek, yn shna ïa ki Bypass ha Jakhalabandha bad Bokakhat ki ban ïarap ban pynduna ïa ka jingkhapngiah ha ki sor, ban kyntiew ïa ka leit ka wan ha sor bad ban kyntiew ïa ka jinglong jingman jong ki nongshong shnong ha ka thaiñ.
Ha kane ka prokram, u Myntri Rangbah duh un plie paidbah ia artylli ki Amrit Bharat Express kiba thymmai – Guwahati (Kamakhya)-Rohtak Amrit Bharat Express bad Dibrugarh-Lucknow (Gomti Nagar) Amrit Bharat Express. Kine ki rel ba thymmai kin kyntiew ia ka leit ka wan lyngba ki rel hapdeng ka thain shatei lammihngi bad ka thain shatei jong ka ri, kaban plie ia ki lad ka leit ka wan kiba shngain ia ki briew.
