Jowai, Kyllalyngkot 18: Ka Tympang Club, kaba dei ka club kaba nyngkong eh ha ka sor Jowai bad ka dong kaba pawkhmat tam ha Jowai, mynta ka sngi ka rakhe ïa ka jingdap 125 snem naduh ba la seng ïa ka ha ka snem 1901.
Ka Tympang Club, kaba dei ka jaka pdeng ba nyngkong eh jong ka sor Jowai, ha kaba ki ophis sorkar ba donkam kum ka ophis u Deputy Commissioner bad ka ophis ka JHADC ki don, bad ka dei ka dong kaba donkam bha ha Jowai.
Haba kren kum u Kongsan ha kane ka sngi, u Bah Wailadmiki Shylla, u MLA jong ka Jowai Constituency bad u Myntri ba dei peit ïa ka koit ka khiah, ka tnat Sports bad Youth Affairs jong ka Sorkar Meghalaya, u la ai khublei ïa ki nongïalam bad ki dkhot ka club na ka bynta ka jinglah jong ki ban pyndonburom ïa kane ka sngi kaba khraw.
U la ïaroh ruh ïa ki jingtrei ka club bad u la kular ban ïatreilang bad ka club na ka bynta ka bha ka miat jong ka dong bad ka sor hi baroh kawei. U Minister ula pynbna plie paidbah ruh ïaka jingplie pyrda ïa ka jingrakhe Quasqui centenary kaba shisnem lynter ka Tympang club, Jowai.
Ka kong Ripnar Lyngdoh (Retd. IAS), ka dkhot kaba pawkhmat jong ka Tympang Club, ha ka jingkren jong ka, ka la ong ba ki jingthoh barim ki pynshisha ba kane ka jaka ka ioh kyrteng na ka Ïawmusiang, kaba mynshuwa ka don ha Nangbah hynrei hadien la pynkynriah pat sha Jowai, ha kaba ia kane ka jaka la tip ruh kum ka Ïawmusiang hi.
Ka Ïawmusiang ka dei ka ïew kaba kongsan tam ha baroh kawei ka Jaiñtia Hills, bad ka dei ruh ka dong ha kaba u Kiang Nangbah u la im bad u la khlad naka jingshah phasi.
Ka la ong ruh ba ka ophis sorkar ba nyngkong eh ba la sdang ha kane ka jaka da ka sorkar British ka dei ka Thanah ha ka snem 1855 bad nangne kala sdang ka jingshong briew ha kane ka jaka. Ka lynti maw barim, kaba sdang naduh Jaintiapur haduh Nartiang bad kaba pynïasoh haduh Goba ha Nowgong, ka iaid lyngba ka Ïawmusiang, kaba pynlong ïa ka ka lynti ïaid paidbah naduh kito ki por.
Namar ba ka dei ka lynti paidbah ki nongïaid lynti ki ju sah basa ha kane ka jaka. Ki briew ki la shong la sah ha kane ka jaka naduh kulong kumah, bad kumta ka la long ka jaka kaba ki briew ki la shong shnong.
Ka la pynkut da kaba ong ba ka dei ha kane ka jaka ba saw ngut ki riewkhraw, kiba kynthup ïa u Ksan Thule, u Woh Khroo (Langdong) Shylla, u Woh Dalin Sutnga, bad u Woh Sing (Suloin) Shylla, ki la sdang ïa ka dong Ïawmusiang 125 snem mynshuwa.
La sdang ïa ka kum ka dong, hynrei hadien la kylla sha ka Ïawmusiang Club, bad hadien pat, da ka jingai jingmut jong i wei i ba haïing jong u Soso Tham, la pynkylla ïa ka kyrteng sha ka Tympang Club. Ka khana pateng ka ong ba u Soso Tham, u myllung ba khraw, u la kynthoh ïa ki kyntien “ïoo Tympang” haba u la ïohi nyngkong eh ïa kane ka jaka, bad naduh kata ka por la tip ïa kane ka dong bad ka club kum ka Tympang Club.
Ha kane ka jingplie ïa ka jingrakhe quasqui centennial la ïoh ruh ïa ka jingkren da u Bah Thombor Chiwat, u CEM ka JHADC, bad kiwei pat kiba la kren ha kane ka sngi ki kynthup ïa u Edelweiss Dkhar, u Chairman ka Club, u Ajoy Lywait, u General Secretary ka Club, bad u Rev. G. S. Shullai, uba la ïalam ïa ka jingduwai.
Shuwa kane, la don ka jingïalang ha ka hall ka club ban pynkup burom ïa ki nongïalam barim ka club kiba la khlad noh da kaba ai khusnam sha ki nongïohkynti (descendants) jong ki. Ia kane ka jingïalang la pynïaid da u R. Lamarr, u Vice Chairman ka Club.
