Shillong, Kyllalyngkot 24: Ka tnad ka rep ka riang ka sorkar Meghalaya mynta ka sngi kala pynlong ia ka iew ia die ia ki marrep, kaba la tip kum ka iew ki nongrep kaba la pynlong ha phyllaw ka ophis ka tnad ri dohkha pyrshah ka St. Edmund College Shillong.
Ia kane ka iew la plie da u bah P S Thangkhiew IAS bala shong thiat bad dei u shongknor ka Meghalaya Farmers’ (Empowerment) Commission ha ka jingiadon lang ki wei ki ophisar na ka tnad rep.
Ki jhur kiba la wan die ha kane ka iew ki long, kum ki pathaw, shriew, soh, ka ngap, ki shynrai kiba la dep tyllait bad song, ki syieng, kha synad, bad bun kiwei kiwei ki jhur kaba ki nongrep kila wan rah na kylleng ka Ri Lum Khasi – Jaintia ki don 30 tylli baroh kiba la wan ban ia shim bynta.
Ka kong Bai Khongwet na ka shnong Wahkhen kala wan ban die ia ki soh bad kiba kham pher na kiwei ki dei ki pla bala thain na ki tyriaw bad kala batai kumno la shna ia ki bad kum ba ka long mynta ki nongwan jngohkai pyrthei ki thied bha ka dor ka long ha peng T.600/- haduh T.1500/- ka shong ha ka jingheh bad ka rukomthain.
Ka kong Victoria Tongper na ka shnong Mawshun na run pynursla kaba wan die kwai kala iathuh ba mynta u snem kwai kham soh bad ka iew riew ruh ka kham biang, haba ia dei bad ka jingiap tram ki dieng kwai kala ong ba mynshuwa ki don hynrei mynta la kato katne snem kam don shuh, ka long ba ia kane ym lah ban ong ei ei namar ka wan na ka mariang.
