Shillong, Kyllalyngkot 24: Mynta ka sngi la pynlong ia ka jingsam ia ki shithi thung kam kaba 18 siem ha ka Ri India baroh kawei, ha kane ka jylla Meghalaya la pynlong ha ktem ki shipai BSF ha Umpling, Shillong ha kaba la sam ia ki shithungkam sha ki 155 ngut kiba na ka jylla Meghalaya bad Arunachal Pradesh kiba la ioh kam ha ka kynhun shipai BSF.
Haba kren ha kane ka jingsam ia ki shithi thung kam u Om Prakash Upadhyay, Inspector General, BSF Meghalaya, u la ai khublei ia kito baroh kiba la ioh kane ka lat ban rung kam ha kane ka kynhun shipai namar tang kito kiba lah shisha kila ioh ban rung ha kane ka kam shipai BSF.
U la kren shai ba kane ka kam ka long ban iada ia ka ri bad ka jingtrei jong ki kan ai mynsiem ia ki pateng ban dang wan ha kaba ai ka jingshakri ia ka ri, u la ai ka jingiaroh ia kito baroh kiba la ioh ia ki shithi thung kam mynta ka sngi.
U Ratan Lal Bagaria, DIG, PSO, ha ka jingkren ka jong u u la ong ba ba kane ka kane ka jingsam ia ki shithi thung kam ka long ban pynkynmaw ba ka sorkar pdeng ka shim ia baroh ki lat ki lynti ban ai kam ia jam ia ki samla bad kane ka dei ka thong kaba u myntri rangbah duh jong ka ri u Narendra Modi u don ia kane la sdang ha u snem 2022.
Na kine ki 155 ngut kiba la ioh ia ka shithi thung kam mynta ka sngi, 76 ngut ha ka kynhun shipai BSF, 42 ngut ha ka kynhun pulit CRPF, 20 ngut ha ka kynhun shipai ITBP, 11 ha ka kynhun shipai Assam Riffle. U myntri rangbah duh jong ka Ri India u la ong ba mynta ka sngi la sam ia ki shihti thung kam sha ki 61000 ngut ki samla kynthei bad shynrang.
