Shillong, Rymphang 06: Ka jingiap jong ki nongbylla tih dewiong kiba khlad ha ka jingbethei dynamait ha krem dewiong ha shnong Mynsyngat – Thangsko ha East Jaintia Hills District kala kiew sha ka 25 ngut.
Katkum ka kyrwoh kaba la phah na ka tnad pulit la iathuh ba baroh kiba khlad ki long 25 ngut bad na kine ki 25 ngut kiba lah ban ithuh ia ki ki long 17 ngut, na ka liang jong ki pulit kila kem ar ngut ki briew haba ia dei bad kane ka jingjia ba sngewsih.
Ha kane ka jingjia ki kynhun kiba la wan ban iarap ban wat ia kiba khlad ki long na ka kynhun, ar kynhun na ka SDRF, shikynhun na ka SRT, lai kynhun na ka NDRF, kila don 7 tylli ki kali Ambulance ban kit ia kiba shitom bad ki shipai suinbad ki shipai ryngkew ruh ki don lada don kam ban iarap.
Lah ban pynkynmaw ba ka jingbethei dynamait kala jia ha ka 5/2/2026 bad ha ka juh ka sngi kiba khlad ki long 18 ngut, bad kiba mynsaw ki long 8 ngut, hynrei ka jingiap kala kiew sha ka 25 ha ka 6/2/2026 bad na ka liang jong ka sorkar jylla kala rai ban iarap lai lak bad u myntri rangbaduh jong ka ri la pynbna ban iarap ar lak sha kiba ha iing jong kiba khlad.
