Shillong, Rymphang 09: Ka Iew Smit ka dei kawei na ki iew nongkyndong kaba la heh, ha kaba ki nongwan thied wan die ki ia poi na kylleng ka Hima Khyrim bad kumjuh na West Jaintia Hills District kiba ia wan sha kane ka iew kaba ju long shisien shitaiew.
Ka jingiapher kane ka iew Smit bad kiwei ki iew ka long ba kane ka iew ka la ioh ia ka nam kaba heh duh ha kaba die ia ki jain rim, ka jingiadie ia kine ki jain ka long ha madan pyrshah ka ophis ka Hima Khyrim ha kaba da ki spah ngut ki briew na kylleng ki wan ban die ia kine ki jain.
Ha kaba kren ha ki lad pathai khubor ki nongdie jain rim kila pynsngew ba ia kine ki jain kila thied na iewduh shibelt shibelt bad ka dor ka long naduh T.15,000/- haduh T.85,000/- tyngka bad kane ka shong katkum ka jinglong jingman jong ki jain.
La iathuh ba na ka jingleit iew ka jong ki ban die ia kine ki jain rim ki shem ba kane ka iew Smit napdeng ki iew nongkyndong baroh ha lum Khasi bad Jaintia ka dei ka iew kaba heh tam ha ka iadie ia kine jain bad kumjuh ruh ki nongthied ki wan na kylleng ban wan jied jain ha kane ka iew.
Ki iathuh ba ka iew hi na ka bynta ki jain ka dei naduh u bnai Risaw ter ter haduh u bnai Nohprah ha kine bnai ka iew ka shongshit bha namar ki briew ia beh ban thied jain hynrei da poi u bnai Kyllalyngkot ka iew jain la sdang ban hiar la ong ba haba ki wan shong dukan kumne ki siew ia ka bai musur sha ka Hima.
