Shillong Rymphang,18: U Chief Executive Member u bah Winstone Tony Lyngdoh ba dei peit ia ka Trade ha KHADC haba jubab ia ka jingkylli u bah Ricky Shullai u MDC ka Laban la iathuh ba ha ka Executive Committee kaba mynta kaba la ialam da ka VPP la ai 73 tylli ki Trading Licences kiba thymmai.
Haba jubab ia ka jingkylli bynrap la ong na ki 73 tylli ki trading licences kiba thymmai 5 tylli ki dei na Laban Constituency, na ka liang u CEM u la ai jingiaroh ia ki dorbar shnong kiba la ia trei shitom ban teh lakam ha kaba iadei bad ka Trading Licence.
Haba ia dei bad ka jingdon kiba ioh ia ki Trading Licences naduh mynshuwa haduh mynta ha u pud u sam jong ka KHADC ki don 5362 tylli, ha ri Bhoi ki don 689 tylli baroh kiba wan ban pynthymmai ki don 369 tylli bad kiba dang sah long 293 tylli.
Haba phai sha ka North Eastern Security Services u CEM u la pyntip hapoh ka iing dorbar ba ia ka Trading Licence kaba la ai ban pyndonkam ha Laitkor hynrei u la pyndonkam bakla ban ioh ia ka jingtrei NIFT Sohra dei halor kane ka konsil ka la pynduh noh ia ki Trading Licence.
Haba jubab pat ia kawei ka jingkylli u CEM haba iadei bad ka jingdon kiba trei sngi ha KHADC ba la wanrah da u bah Srally Rashir la ong ba ki don 97 ngut na kine 88 ngut la pyndonkam ha ka Executive Committee bad 9 ngut ha ka Legislative ka jingsiew ia ki ka long don kiba ioh san hajar don kiba ioh phra hajar bad don kiba ioh khatar hajar shi bnai.
Ha kane ka sngi u bah Seiborlang Warbah u la wanrah ia ka mang tyngka kaba lai bnai hapoh ka iing dorbar ka KHADC ka ban sdang trei kam naduh ka 1 tarik Iaiong 2026 bad kan kut ha ka 30 tarik bnai Jylliew 2026 ka jingmang pisa baroh na ka bynta ki 9 tylli ki tnat trei kam ha KHADC ka la kot sha ka 36,99,83,830 klur tyngka.
