Shillong Rymphang,18: Mynta ka sngi ka 18 tarik Rymphang 2026 u bah Seiborlang Warbah Executive Member ba dei peit pla pisa ka KHADC ha ka sngi sdang ka dorbar mang tyngka 2026-2027 u la wanrah ia ka Khasi Hills Autonomous District Council Member Pension Repealing Bill 2026 hapoh ka iing dorbar.
Katkum kane ka Bill kaba la wanrah ha iing dorbar mynta ka sngi ka long ban pynduh noh ia ka Khasi Hills Autonomous District Council Members Pension Act 2002 , kaba kat kum kane Ka Act ka long ba ki MDC ba la rem kim ioh ia ka baibam man u bnai namar ba kim dei nongtrei sorkar kumta kim don hok ban ioh ia ka baibam hadien ba la rem ia ka elekshon.
Haba pynshai hapoh ka iing dorbar haba iadei bad kane ka bill na ka liang jong u EM u la ong ba katkum katei ka Act ki MDC ba la rem kin ioh ia ka baibam kaba san hajar tyngka hynrei namar ba kim dei ki nongtrei sorkar lane ba la thung da ka sorkar jylla kumta la wanrah ia kane ka bill ban pynduh noh ia kane ka Act, ia kaei kaba dei ban siew ka KHADC kan sa siew katkum ka jingdon ka pisa.
U nongialam ka liang pyrshah u bah Titosstarwell Chyne u la pynpaw ia ka jingkyrshan ka jong u ia kane ka bill bad u la ong wat ha ka por jinglong CEM ka jong u,u la don ka jingpyrkhat ban pynduh noh ia kane ka ain namar ka ktah ia ka pla tyngka jong ka District Council u la ong ba u la ai jingkyrshan haba iadei bad kane ka bill ban pynduh noh ban siew baibam ia ki MDC kiba la rem namar man la elekshon kin don beit 25 ngut kiba rem.
