Shillong, Rymphang 20: U Lamphang ka iing dorbar thawain ka jylla u Thomas A.Sangma u la pynbna hapoh iing dorbar ba ha ka jingialang ka Business Advisory Committee kila shim ia ka rai ban pynsangeh ia baroh ki kam ka iing dorbar mynta ka sngi ban pynpaw ia ka jingsngewlem halor ka jingkhlad u MP u Dr. Ricky A J Syngkon u la ong ba kane ka jingiashong dorbar kan long beit thik na ka bynta ban pynpaw ia ka jingsngewlem ia u MP ba la khlad noh.
Ia ka jingkren sngewlem la sdang da u nongialam ka iing dorbar thawain ka jylla u Myntri Rangbah u Conrad K. Sangma, ha ka jingkren ka jong u u la iathuh ba dang ha kine ki 15 sngi ba la dep u Dr. Ricky u la wan ia kynduh ia u ha iing sah ha Nongbah Delhi ha kaba ki la iakren na ka bynta ki kam jong ka jylla ba kumno ban pyn tyllun sha khmat.
U Myntri Rangbah u pynpaw ia ka jingsngewsih kaba khraw halor kane ka jingkhlad syndet jong u Dr. Ricky ka long ka jingduh kaba khraw ym tang ia ka 1-Shillong (ST) Parliamentary Constituency hynrei ka jingduh ka long ia ka jylla hi baroh kawei ha kajuh ka por, u phah ia ka khubor sngewlem sha kiba haiing hasem bad u duwai ba u Dr. Ricky un ioh ia ka jingjahthait bymjukut.
U Nongialam ka liang pyrshah u Dr. Mukul Sangma ha ka jingkren jong u u la pynpaw ia ka jingsngewsih haba iadei bad kane ka jingjia ka bym poi pyrkhat kane ka long ka jingduh ia ka jylla baroh kawei.
Kiwei ki dkhot ka iing dorbar kiba la ia shim bynta ha ka jingkren sngewlem ki long u bah Charles Pyngrope, u bah Mayralborne Syiem, u bah Ronnie V. Lyngdoh, u bah Charles Marngar u bah Adelbert Nongrum bad kiwei kiwei.
Kum ka dak jong ka jingsngewlem na ka bynta ka jingkhlad noh u MP Dr. Ricky A J Syngkon ka iing dorbar kala pynlong ia ka jingsngap jar kaba ar minit.
