Shillong, Rymphang 20: U Myntri Rangbah ka jylla u Conrad K.Sangma, u nongialam ka liang pyrshah u Dr. Mukul Sangma, ki MLA ki MDC kumjuh ki riew paidbah kila ialeit sha iing kmie jong u MP bam kwai ha dwar u blei u Dr. Ricky A J Syngkon ha Pohkseh ban leit sngewlem ha kane ka jingjia ba sngewsih.
U Myntri Rangbah ka jylla u Conrad u la iathuh ba u Dr. Ricky u dei u nongialam u ba ia kren ia khana bad baroh ki nongialam sain pyrthei bad u long u briew u ba baroh ki pdiang ka jingkhraw ka jong u nalor ka jingstad, ka jingshemphang kaba pynkhraw ia u u don ia ka mynsiem sngewrit bad ka jinglong kaba shi sur.
La iathuh ba u la ia kren bun bunsien haba ia kynduh bad u bad man ka por ba ki ia kren ia khana ka paw shynna ka jinglongluilui bad ka jingkut jingmut ban trei na ka bynta ki paidbah bad ka jylla.
U Nongialam ka liang pyrshah u Dr. Mukul Sangma u la ong ba bunsien ki briew ki kiar ban ia tynrong ia kane ka kam ha ka sain pyrthei, hynrei bunsien ka ju long ba lada ki kmie ki kpa ki dei kiba ia kit ia bah ha ka sain pyrthei ki khun ruh ki ia bud lem ia kata ka lynti bad kane ka long ka nuksa ia ki samla ba kin wan sha khmat ban ia shim bynta ha ka sain pyrthei.
Ia ka met jong u Dr. Ricky la pynkit mynta ka sngi sha iing jong u ha Nongsder ha kaba bun spah ngut ki la leit synran lang bad ka jinglehburom khatduh kan long lashai ka sngi ka 21/Rymphang/2026.
