Shillong, Rymphang 23: U Myntri Rangbah ka jylla u Conrad K. Sangma u ba bat ruh ia ka pla pisa mynta ka sngi u la wanrah ia ka mang tyngka na ka bynta u snem 2026-2027 kaba duna T.2672/- Klur tyngka kaba dei 3.5 % na ka ioh ka kot ka jylla.
Haba phai sha ka jingpynlut kaba ka sorkar kan sa pynlut ha u une u snem mang tyngka la antad ba kan long T.32,032/- Klur tyngka la antad, ba ka jingmih kan long T.32,000/- klur, la antad ba ka jingioh kan long T.26,583/- klur na ki khajna bad na kiwei ki jingioh T.5,417/- klur khlem da khein ia ka ram kaba ka jylla ka dei ban ioh T.5,379/- klur. Kumta ka jingioh kan long T.26,621/- klur.
La buh antad ba ka jing pynlut kan long T.32,023/- klur na kane ka jinglut kaba man ka sngi ha ka shi snem kan long T.21,812/-klur bad ka jing pynlut ha ka jingdon jingem kan long T.10,211/- klur khlem da khein ia ka ram kaba dei ban siew T.2,731/- klur. Kumta la antad ba ka jinglut kan poi T.29,293/-klur.
Ka jingsiew tang ia ka sut ha u snem mang tyngka 2026-2027 kan long T.1,540/- klur kane kaba la shu antad bad ka jinglut ban siew ia ka baibam tymmen ka long T.1,980/-klur haba shim na kane ka jingkhein ka pisa kan nang sah sa T.4,771/-klur hynrei ha ban sa pynkut ia ka jingkhein ha kane ka snem mang tyngka ka pisa kan sah sa T.714/-klur kumta kane ka mang tyngka mynta u snem ka duna da T.2,672/-klur.
Ha kane ka jingkren mang tyngka kaba 32 sla u myntri rangbah ka jylla u la kdew shai ia baroh ki tnad sorkar kiba yn sa pyntrei kam mynta u snem mang tyngka ha kine ki 32 sla la,ktah kut ia barok ki jait skhim kiba ka sorkar kan pyntrei kam bad la khmih lynti ba ka jingioh na ki khajna na ka jylla kan long T.4,824/-klur bad kaba kongsan eh ka long ban shna ia ki surok.
U la jer kyrteng katto katne ki surok ban shna, ka suron na Nongstoin Maweit Nongjri kan long T.383/- klur, ka surok Mawphlang Balat Ranikor ka bynta ban shna na Weiloi sha Phlangwanbroi kan long T.280/- klur, na Chokpot sha ka Karukol kan long T.136/- klur kine ki long tang ki katto katne kiba la ai nuksa.
