Shillong, Rymphang 23: U Myntri Rangbah ka jylla u Conrad K.Sangma u la iathuh ba da ka jingpynkylla ia ki kyndon ha ka 16 Finance Commission ia ka jingbhah ia ka pisa na ki khajna kiba ka sorkar pdeng ka lum kin don 14 tylli ki jylla ha ka Ri India ki ban duhnong na kane ha kaba ka jylla Meghalaya kan duhnong da T.1500/- klur.
U Myntri rangbah u la ong ba ha ka 15 Finance Commission ia ka jingbhah ia ka khajna ba la lum da ka sorkar pdeng la pynkiew sha ka 41% na ka bynta ka jylla, hynrei ki jylla kiba noh kham bun ka jingioh sha ka sorkar pdeng naduh ki por kiba mynshuwa bad ha ka 16 Finance Commission ruh ki la daw aba ka jingbhah kan long katkum ka jingnoh na ka jingioh sha ka sorkar pdeng ia kaba kane ka 16 Finance Commission mynta ka la ai jingmut sha ka sorkar pdeng ia kaba la pdiang ia ka.
Da kane ka rukom ia bhah da ka khajna ki don 14 tylli ki jylla ha ka Ri India ki ban duna ka jingioh dei halor kane ba u la ia kynduh ia ka Myntri pla pisa ka sorkar pdeng ban ia kren ia kane ka phang namar kane ka ktah ia baroh ki jylla kane ka thain shatei lammihngi kaba ka jingmih na kine ki jylla ka long kaba duna bad ia kane ka bynta yn dang bteng ban iakren bad ka sorkar pdeng lyngba kiwei Pat ki lad ki lynti.
Haba jubad ia ka jingkylli u myntri rangbah u la ong ba ka sorkar ka khmih lynti ba ka jingkiew na ka jinglum khajna kaba dei na ka jylla kan long kham bun eh na ki lai tylli ki tnad trei kam, kata na ka GST, na ka khajna na ka kyiad bad kawei pat na ka value Added Tax bad kumjuh na ki kali bad kiwei kiwei de kiba ka sorkar ka dei ban ioh.
