Shillong, Rymphang 23: U Myntri Rangbah ka jylla u Conrad K. Sangma u la pynrem jur ia kaei kaba la jia ia lai ngut ki samla kynthei ha Nongbah Delhi kiba la shah kren bein ha ki ar ngut ki shi kurim kiba ia sah wai ha kajuh ka iing tang namar ba ki dei na Northeast.
U Myntri Rangbah u la ong ba ki bor jong ka ain ki dei ban leh ia kaba donkam lane lada donkam ban ia kren bad ki bor ki bahalor na ka liang jong u myntri rangbah ka Meghalaya la long u ba la kloi ban pyntikna ba kum kine ka jingkren jaitbynriew kam dei ban jia.
U la ong ba ha Ri India ki don shibun ki jait bynriew bapher bapher kumta donkam ban ia burom mar kylliang iwei ia iwei, kane ka jingleh jong ki ar ngut shi kurim da kaba kren ia ki kyntien ki bym sngewtynnad ka long kaei kaei ka ba ym lah ban pdiang kumta u khmih lynti ba ki bor ka ain kin leh ia kaba donkam.
Ha kajuh ka por u myntri rangbah u kyntu ia baroh ki paidbah nong shongshnong ka Ri India ba kum kine kiei kiei kim dei ban jia hangno hangno ruh la ka dei ha kano kano ka jaka ha ka Ri India namar baroh ngi dei ki Nong India ngi hap ban ia burom mar kylliang.
