Shillong, Rymphang 23: U Myntri Rangbah ka jylla u Conrad K.Sangma haba jubab ia ka jingiakren jong u Lat u C.H Vijayashankar ha ka sngi sdang ka dorbar mang tyngka 2026-2027 u la ong ba un nym lah ban jubad ia ka jingkren jong u wei pa u wei u MLA hapoh ka iing dorbar hynrei ia kaei kaba ki kren ka sorkar ka la thoh bad kan sa leh ia kaba donkam.
U la ong ba ha ka jingkren ka jong u Lat la kdew ba ka jingkiew ka ioh ka kot ka jylla ka long 9.66 % kaba mut ka wan ba ar hadien jong ka jylla Tamil Nadu kaba long 11.9 % ia kane la khein na ka jingkiew ka ioh ka kot kaba long 10% ha kine ki lai snem lynter bad kane ka kren shai ba ka jylla kan sa kynjoh sha ka jingkiew ka kamai kajih kaba T.85,000/- klur bad kane ka kdew shai ban poi sha ka 10 billions ka jingkiew ha ka ioh ka kot.
Haba shim pat ia ka jingkhein na ka jingdon jong ki briew na ki 28 tylli ki jylla,ka jylla ka don ha ka kyrdan kaba 26 namar ka jingkiew ha ka jingdon briew ka long 9.5 % bad ka ioh ka kot ka long T.18,954/- tyngka.
U Myntri Rangbah u la ong ba lada shim ia ka jingsiew ia kiba trei sngi ka jylla Meghalaya ka wan ba ar namar ki siew T.525 tyngka kane ka long hadien ka jylla Karnataka kaba siew T.581 tyngka ia ki nongbylla sngi kane ka kren shai ba ka sorkar ka ialeh ban kyntiew ia kiba duk ba rangli haba phai sha ki kam kontrak, u myntri rangbah u la pynshai ba ia ki jingtrei kiba heh ki don ki kyndon kiba la buh katkum ki jingtrei hynrei na ka bynta ki kontraktor kiba rit ka sorkar kam shym la ieh bein u la ong ba ha u snem 2019 ka jingioh kam jong ki ka long tang T.454/- klur bad mynta ka la kiew sha ka T.1300/- klur.
Haba phai ha ka ioh kam ioh jam ha ki bynta bapher bapher lyngba ki lad ki lynti kiba ka sorkar ka la shim ki la kot sha ka 3.8 ngut kine ki long tang ki katto katne ki bynta ba kongsan, ha ka tnad pulit ha ka 5/Lber /2026 yn sa ai ia ki shithi thung kam sha ki 3000 ngut ki samla ka ban sa long ha Tura.
Mynta ka sngi u myntri rangbah u la pynbna ruh ba ka sorkar kan sa bei pisa ia ki riew wad bniah ban leit sha Combodia ban wad ia ka jingtip kaba bniah ia ka jingiadei hapdeng ki jait bynriew Monkhmer bad ki Khasi-Jaintia yn leh ia kane ban pynshisha ia ka thymmei lyngba ka DNA, hooid wat la ki jait bynriew Garo ki tip ba ki wan na Tibet hynrei ia kane ruh yn sa dang wad bniah shuh shuh ia ka thymmei ka jong ki.
