Shillong, Rymphang 24: Ka Party Congress ka la pynbna ia ki 24 ngut ki kyrtong ki ban ia khun ia ka MDC Election sha ka iing dorbar ka Garo Hills Autonomous District Council ( GHADC).Na ki 29 tylli ki MDC konstitwensi kiba dang sah mynta ki long sa san tylli kaba ka congress kan sa pynbna ha kine ki sngi ba dang wan.
Ka Election sha ka iing dorbar jong ka GHADC kan long ha ka 10/ Iaiong/2026 bad na ka liang jong ka party ka la pynkhreh bad haba ai tiket ia ki kyrtong ka long hadien ba kala bishar bniah ba ki don ka jingkyrmen ba kin poi sha ka jingjop ha kane ka kynti kaba mynta.
Ki nongpeit pyrman ha ka sain pyrthei ha Garo Hills ki pynsngew ba ka jingiakhun ha kane ka MDC Election kaba mynta kan long hapdeng ka Congress bad ka NPP kaba synshar mynta ha GHADC bad ka jingpynduh tiket ka NPP ia u CEM kala buh shibun ki jingkylli ha khmat ki paidbah.
Ha kane ka kynti kaba mynta ka Garo National Council kaba don u wei u MDC u ba iatrei lang bad ka NPP ki don ka jingkyrmen ba kin jop kham bun ha kane ka kynti kaba mynta haduh mynta la ioh jingtip ba kane ka party kan pynieng kyrtong ha ki 7 tylli ki konstitwensi.
Kiwei ki party ka BJP kaba don u wei u MDC ka khmih lynti ba kan dang jop shuh ha kane ka kynti kaba mynta ka TMC bad ka NCP kin long ki party ki ban dang ia shim bynta ha ka sien kaba nyngkong ha ka MDC election ha GHADC.
