Shillong, Rymphang 24: U bah Wailadmiki Shylla myntri ba dei peit ia ka koit ka khiah ka jylla u ong ba katkum ka kaiphot kabala ioh da ka tand ka koit ka khiah na ka jingtohkit halor ki jingjia kiba ia dei bad u Dr. Ricky A J Syngkon MP bam kwai ha dwar u blei ha CHC Mawiong.
U myntri la ong ba ki jingjia ki long kumne, ha ka por 6.53 pm ka 108 Ambulance kala ioh ia ka jingpyntip bad mar dor la phah ia ka Ambulance na Lawmali sha jaka ialehkai kynjat boll ha Mawiongrim.
Ha ka por 7.15 pm la pynpoi ia ka met jong u Dr. Ricky ha Mawiong CHC da ka jingsynran lang ki briew kiba la pyntip ia ka jingkyllon u MP ha madan ialehkai, haba poi sha CHC ym tip briew shuh, haba thew ia ka jingiaid ka snam kam trei kam shuh bad ki thied ruh kim trei kam shuh.
Ha katei ka por ki Nurse kiba don ha kane ka CHC da kaba phone sha u doktor bad ha ka juh ka por la pyndait Oxygen bad la leh ruh ia ka Cardiopulmonary Resuscitation wat hapdeng kine kine ki jingsumar ym shym la don kano kano ka dak ban pynkhih.
Namar ka jingbym pyni ia ki dak la rah mardor sha ki jaka ai jingsumar kiba kham biang bad ia kane ka phah noh sha ki jaka ba kham biang la leh ha ka por kumba 7.20 pm, ia u ba shitom la kit na Mawiong CHC da ka Ambulance ryngkat ka jingpyndait ia ka Oxygen.
Ka Ambulance kala poi sha Dr. H Robert Gordon Hospital ha ka por 7.40 pm ha kaba ia u nongpang la shimti da ki bor jong katei ka hospital, kane ka dei ka kaiphot jong ka jingtohkit haba ia dei bad ka jingjia ba snggewsih ia u Dr. Ricky AJ Syngkong bam kwai ha dwar u blei.
