Shillong, Rymphang 27: Ka Archery Association of Meghalaya ba la ithuh ia ka da ka Archery Association of India, ka la lah ha kaban pynlong ia ka NTPC Khelo India North East Zone Open Archery Tournament kaba dei naka bynta ka kyrdan iakhun jong ka Recurve bad ka Compound Divisions, ia kaba la pynlong ia ka ha madan ialehkai jong ka SAI, STC ha NEHU, Umshing, Mawlai Mawkynroh,, ba la long ha kine ki ar sngi katta ha ka 26 bad ka 27 tarik mynta u bnai Rymphang, 2026.
Haba phai sha ka jingiakhun kaba dei jong ka Recurve, la don haduh 6 tylli ki jylla kiba la hiar madan ban iakhun, ha kaba ha ka por mynstep la pynlong ia ka qualifying rounds bad bteng sha ka elimination rounds bad pynkut pat da ka jingiakhun iaknieh khur takma ne ki medal matches ha ka por nohphai sngi.
Ha ka sngi kaba bud pat, ka la don ka jingiakhun kaba dei naka bynta ka kyrdan iakhun ka Compound, kaba hangne la iakhun biang da ki 6 tylli ki jylla ba kynthup ia ka Meghalaya, Sikkim, Manipur, Assam, Nagaland bad Arunachal Pradesh ba la iakhun lang da ki shynrang bad kynthei.
Ha kane ka sngi, la hiar ban sakhi lang da u myntri ba dei khmih ia ka tnat Sports & Youth Affairs u bah Wailadmiki Shylla, ba la long kum u kongsan bad ban sam ruh ia ki prais sha ki nongjop.
Kiwei kiwei kiba la sakhi lang ki long u Dr K B Gurung, General Secretary, Sikkim Archery Association bad Vice-President Archery Association of India, Chekrovolu Swuro, Olympian, Arjuna Awardee, President ka Nagaland Archery Association bad Vice-President Archery Association of India, u Rupesh Kar, General Secretary West Bengal Archery Association, Kong M War Nongbri, Chief Adviser, Archery Association of Meghalaya.
Haba phai sha ki resol jong kane ka jingiakob, ha ka kyrdan iakhun jong ka Individual Olympic Recurve ki kynthei, ba nyngkong dei ka Yumnam Anuparna Devi ka Manipur, katba ia ka kyrdan kaba ar bad ba la lai ka leit sha Vesuvelu Swuru bad Kevikienko ka Nagaland.
Habaphai pat sha ka kyrdan iakhun jong ka Indian Olympic Round Recurve men, ka kyrdanba nyngkong kaleit sha u Devrah Mohapatra ka Meghalaya bad ka kyrdan ba-ar bad ba-lai ka leit sha K.R Meitei bad Vivek Sunar ka Manipur bad Meghalaya.
