Shillong, Rymphang 27: Ka seng samla pule Jaintia Student Union kala pynrem jur ia u Bah Ardent Basaiawmoit u President jong ka VPP halor ka jingthmu ban kyntait bad ban weng noh ïa ka jaitbynriew Pnar ne Jaintia na ka Reservation Policy jong u snem 1972.
Ka JSU ka ieng pyrshah halor kane ka jingthmu ia ka ban weng noh ia ki Pnar ne Jaintia ha ka ban ithuh Ia ki kum ki nongshong shnong hapoh ka jylla Meghalaya. Iaka Meghalaya ka kynthup ia ki lai tylli ki jaitbynriew kita ki long ka jaitbynriew Khasi – Jaintia bad Garo.
Ka JSU lynba ki pathai khubor ka batai shai ba ia ka Autonomous District Council la ithuh da ka sorkar India kaba kynthup ia ka Khasi Hills Autonomous District Council, ka Jaintia Hills Autonomous District Council, bad ka Garo Hills Autonomous District Council kiba hap hapoh ka jylla Meghalaya.
Kumta la ong ba ka jingai ïa ka Scheduled Tribe certificate da ka Office jong ka Deputy Commissioner ka pyni shai ba ki briew kiba la kha ha Jaintia Hills ki dei na ka jaitbynriew Jaintia (Pnar), ym na ki Khasi. Haba peit ia ki jaitbynriew Jaintia wat la ki iasam katto katne ki jingïadei bad ki Khasi, kum ka kyrteng, ka riti ka dustur, ka kolshor bad ka jingngeit ba kyrpang.
Kumta ka JSU ka kyntu ia ki paidbah jaitbynriew Jaintia ba ki dei ban long kawei ha kum kane ka por ban iengskhem ha kawei ka nongrim ban nym ailad da leilei ruh ia ka ban phiah ne ban weng ne ban pynsnoh ia ki jaitbynriew Jaintia sha kiwei pat, bad ban pynskhem ia ka hok long trai hangne hapoh ka jylla Meghalaya.
