Shillong, Rymphang 27: Ka bynta kaba 4 jong ka lympung ialehkai Assam Rifles Sentinels Cup Football (Tournament (Men & Women) 2026 ka la kut noh ha ka 27 tarik Rymphang 2026, kaba la pynlong sa kawei pat u mawjam ha ka jingpyrshang jong ka Assam Rifles ban kyntiew ïa ki kam ïalehkai bad ka jingïashim bynta jong ki samla ha ka thaiñ shatei lammihngi.
Ia kane ka lympung ialehkai la pynlong naduh ka 17 haduh 27 tarik Rymphang 2026 ha ki jaka bapher bapher ha kylleng ka nongbah Shillong, ha kaba la sakhi ia ka jingiashim bynta shitrhem bad ka jingkyrshan kaba radbah na ki riew ieid phutbol ha kylleng ka thain.
Da kaba tei ïa ka pateng kaba khlaiñ jong ki bynta ba ladep jong ka, ka Sentinels Cup sa shisien ka la paw biang kum ka rynsan ïalehkai phutbol ba pawnam. Kane ka lympung ka la pyni ia ka jingialehkai phutbol kaba tbit bha, ka mynsiem ialehkai bad ka nuksa jong ka mynsiem ialehkai, kaba pynskhem biang ia ka kolshor ba riewspah jong ka thain shatei lammihngi ha ka jingialehkai phutbol.
Ki kynhun na ki kynhun ialehkai phutbol bapher bapher jong ka jylla Meghalaya, ha ryngkat ki kynhun jong ka Assam Rifles, Indian Armt bad Meghalaya Police ki la ïakhun tyngeh ha kane ka lympung ialehkai. Ka jingïalehkai ka la bud ïa ka rukom pynbeit kaba ryntih kaba kynthup ïa ki jingïakhun hapdeng ki kynhun bad ki jingïalehkai knockout, kaba la kut ha ki jingïalehkai phainal kiba shongshit na ka bynta baroh ar ki thup Shynrang bad Kynthei.
Ha ka thup jong ki shynrang, ka Smit SC ka la long ka lahduh hadien ba ka la ïakhun tyngeh ïa ka phainal pyrshah ïa ka Assam Rifles FT kaba la pyni ïa ka jingtbit bad ka jingïatreilang. Ha ka thup jong ki kynthei ka Assam Rifles FT ka la rah ïa ka nam lahduh da ka jingïalehkai kaba itynnad pyrshah ïa ka Laitkor SC kaba la ïoh ïa ka jingïaroh kaba khraw na ka bynta ka jingkut jingmut bad ka jinglong ryntih jong ki.
Ki lahduh ki la ioh ia ka khusnam pisa kaba mar Lai lak tyngka ryngkat bad Assam Rifles Sentinels Cup Trophy. Kiba wan ba ar ha baroh artylli ki thup ki la ioh ia ka khusnam pisa kaba mar ar lak tyngka.
Ïa ka phainal bad ka jingialang pynhap pyrda la plie paidbah da u Lt Gen Vikas Lakhera, AVSM, SM, DG Assam Rifles uba la ïadon lang kum u Kongsan. La don lang ruh ki ophisar jong ka Assam Rifles, ki kynrem ki lyndan, ki ophisar jong ka tnad ialehkai bad ki nongpeitkai, kaba la kyntiew ia ka burom jong kane ka lympung jingialehkai.
Ka Sentinels Cup ka dang bteng ban pyni ia ka jingkut jingmut jong ka Assam Rifles ban long ‘Ki paralok jong ka thain shatei lammihngi’, da kaba pyndonkam ia ka kam ialehkai kum ka atiar kaba donbor ban ai mynsiem ia ki samla ban kiar ia ki kam lehnoh bad ka jingdih drok katba ka ialam lynti ia ki sha ki kam kiba bha.
Ka Assam Rifles, lyngba ka jingiateh bad ka Bhaichung Bhutia Football Academy bad ka Assam Rifles Public School (Sports), ka kut jingmut ban shem bad kyntiew ia ki samla na ka thain kiba don sap ha ka jingialehkai photbol. Kane ka lympung ka iahap bha bad ki sienjam jong ka Sorkar India kum ka Khelo India Abhiyan bad ka Fit India Movement, kaba pynskhem ia ka bynta jong ka kam ialehkai ha ka jingtei ia ka ri.
Kane kam dei tang ka jingiakhun, ka Assam Rifles Sentinels Cup ka long kum ka dak jong ka jingiatylli, ka jinglong kaba ryntih bad ka mynsiem jong ka thain shatei lammihngi. Ka bynta kaba saw jong kane ka lympung ka la wanrah lang ia ki jait bynriew, ki nongialehkai bad ki jaka treikam ha ka rukom kaba sah jingkynmaw ia ki jingiakhun kiba shongshit bad ki jingialehkai kiba ai mynsiem.
Ka jingpynlong kaba jop ia kane ka lympung ka la wan lyngba ka jingkyrshan jong ka NEEPCO, ka nongbei tyngka ia kane ka lympung, kaba ieng skhem na ka bynta ka jingpynkupbor ia ki samla bad ka jingkyntiew ia ka kam ialehkai kaba la don ka bynta kaba heh ha kane ka jingjop bad ngi ai jingsngewnguh ruh ia ka Hill Myna Magazine kum ka Magazine partner ha kane ka bynta jong ka Sentinels Cup.
Da ka jingkut noh jong kane ka bynta kaba 4, ka Assam Rifles Sentinels Cup ka dang bteng ban kiew kum ka lad ia ki nongialehkai phutbol bad ka dak jong ka jingiadei hapdeng ka Assam Rifles bad ki briew jong ka thain shatei lammihngi.
