Shillong, Nohprah 09: Ka jingiashrud para congress kan ktah ia ka party ha kane ka election kaban sa wan ha u snem 2013. Ka jingpynslem jong ka seng Congress ban pynbna ia ki kyrtong kan ktah shibun ia kito ki kyrtong kiban ia khun na ki constituency kiba ka Congress ka hap ban ia khun pyrshah ia ki MLA jong kiwei ki party.
Ki nongialam jong ka seng Congress haba kren ha u SP News Agency ki iathuh ba kane ka jingiakynad hapdeng ki nongialam jong ka seng Congress khatam kito kiba ha khlieh ka ktah shibun ia ka seng. Kumba ka long mynta ka la iaid ka hamsaia ba ki ar ngut ki MLA jong ka Congress kin duh tiket.
Ki thymmei khubor kiba ia jan bad ka seng Congress ki iathuh ba u MLA jong ka Umroi u Bah Stanlywis Rymbai bad u Bah Sayeedullah Nongrum na Rajabala ki lah ban duh tiket. La sngewthuh ba ia tiket na ka Umroi ka lah ban leit sha u Bah Ngaitlang Dhar bad na Rajabala ka lah ban leit sha u wei na ki MLA independent u ba kyrshan ia kane ka sorkar kaba mynta.
Katba ha Pynursla la ong ba ka tiket ka lah ban leit sha u Bah Prestone Tynsong bad na Mawthadraishan pat ka seng kam pat lah ban rai namar haba ia nujor hapdeng u Bah Boldness L Nongum bad ka Kong Irin Lyngdoh ka don ka jingiapher ha kiba bun kiliang.
Bun na ki nongialam jong ka seng Congress ki sngew ba kane ka jingpynslem jong ka seng ban pynbna ia ki kyrtong kan ktah khamtam eh ha ki to ki jaka kiba ka seng Congress ka hap ban ia khun pyrshah ia kiwei ki party kiba la don u MLA jong kiwei.
Ki thymmei khubor na Garo Hills ki iathuh ba wat u myntri rangbah ka jylla ha kane ka kynti kaba mynta yn nym lah ban jop da kaba suk namar ki liang pyrshah kin pyrshang ban buh tang uwei u kyrtong ban ia khun. (SP News)
