Shillong, Nohprah 09: Ka seng Meghalaya Peoples Human Rights Council kan sa pynlong ia ka jingrakhe ia ka sngi burom ia ka hok long briew man briew ha Shillong la shai ka sngi. Ia kane ka sngi la rakhe ha satlak ka pyrthei namar dei ha kane ka sngi ba ka United Nation ne ka dorbar bah jong ka pyrthei ka la shim ia ka rai ba ia ka hok long briew dei ban ai jingiada.
Ka pyrthei baroh kawei ha ka 10 tarik jong u bnai Nohprah ka rakhe pyndon burom ban kynmaw ba da ka jingshim jong ka United Nation ia ka rai ban ai jingiada ia ka hok long briew man briew ka la wanrah bun ki jingkylla ha kane ka sla pyrthei ha kaba ki briew ki la lah ban ioh ia ka jingda na ka jingshah thombor.
Ka phang pdeng jong ka jingiaphylliew jingmud kaba ka MPHRC ka buh ha khmat jong ki paidbah mynta ka long “ My Voice Count” kaba mut “ia ka sur jong nga ruh la niew lang” ka jingiakren kan long ruh ba baroh ki ia long mar ryngkat ban ia shim bynta ha ki kam shakhri paidbah ha ka imlang sah lang.
Ha kane ka sngi u shngnor jong ka iing dorbar thawain ka jylla un sa wan ban plié ia kane ka jingialang ban rakhe ha kane ka sngi burom ia ka hok long briew.(SP News)
