Shillong, Lber 10: U Deputy Commissioner jong ka West Garo Hills District u Vibhor Aggarwal IAS mynta ka sngi ula pynbna paidbah bai aka korphiw ula pynjlan shuh sa 48 kynta ha baroh kawei ka West Garo Hills District kata kan long haduh ka 12 baje mynstep 13/Lber/2026.
U Deputy Commissiomer haka hukum kaba la pynmih mynta ka sngi baia ka korphiw ha West Garo Hills District la pynjari hapoh ka kyndon 163 BNSS haka 9/Lber/2026 namar kila mih jinghuri hura bad kane kala ktah iaka shong suk shong sain bad kane kala buh jingma iaka jingim briew bad kumjuh iaka jingdon jingem.
Hadien bala bishar bniah iaka jinglong jingman la donkam ban shim iaki lad ki lynti jingiada na ka bynta ban pynneh pynsah ia ka shong suk shong sain kumta katkum ki khubor bala ai ha ka kyndon 163 BNSS kumta la pynjlan iaka korphiw sha ka 48 kynta ha West Garo Hills kumta ka korphiw kaba la treikam naduh ka 12 baje mynstep ka 10/Lber/2026 ban kut ha ka por 12 baje mynstep ka 11/Lber/2026 bad kan bteng biang na katei ka por bad kan kut haka 13/Lber/2026 mynstep lada kam don ka jingweng noh iaka korphiw.
Ha kane ka por bala pynjari iaka korphiw la mana ia baroh ki briew ba kim dei ban mih Shabar naka iing jong ki, baroh ki skul kin khang, ki bank, ki iew ki hat, ki dukan, ki ophis bad kino kino kiba iadei bad ka jaka treikam hapoh West Garo Hills District.
Ha kajuh ka por la shah ia kito ki briew kiba pynbiang iaki jingdonkam kum ki nongtrei hospital, ki dukan dawai, ki kali kit nongpang bad kino kino ki jaitkam bala ai jingbit da ki bor jong ka district la bthah ia baroh ki bor kiba dei ba kin pyntrei kam pura ia kane ka hukum ba lada lap ba don mano mano ba pynkhein yn pynshitom hapoh ka kyndon ain 223 ka BNS.
