Shillong, Lber 12: Mynta ka sngi ka shongsuk shong shngain kala sdang wanphai ha West Garo Hills District khamtam ha ka nongbah Tura ha kaba ki nongshong shnong kila ia mih ban pynkhuid ia ki synrum na ka daw jong ka jingklumar ha kine ki sngi.
Ki synrum ki synrah kila saphred ha surok na ka daw ki riewsniew kiba la prong bad lute bad pynjot pynpra ia ki dukan bad bun ki dukan kila shah thang ha ki jaka bapher bapher jong ka sor Tura.
Ki paidbah nongshong shnong ban iada ia ki nonglehkam sniew kila shim ia ka rai ban pynlong ia ka jingap shnong ban pynneh ia ka shongsuk namar kila don ki riew shim kabu kiba thmu ban leh ia ki kam beain.
Ki nongshong shnong kila shim ia kane ka lad ban ap shnong ha ki bynta bapher bapher jong ka sor Tura ka long ban iada ia ki iing ki sem,ia ki khaii khaba bad ia ka kyntoit ka jingiatrei ryntih jong ki dong bapher bapher ka long ban iada na ki riewsniew ha kum kane ka por.
U myntri rangbah ka jylla u Conrad K.Sangma mynta ka sngi u la leit jngoh ia ki dong bapher bapher ban sngewthuh haduh katno ka jingduh la pynjulor ha kine ki sngi ba don ka jingiakhih.Ha kane ka jingleit u la ia kren bad ki paidbah ba kumno ban wanrah biang ia ka shongsuk shongsain.
Ha kane ka sngi ki riew paidbah kila ia mih ban ia trei lang ban pynkhuid ia ki surok bad la pyndonkam da ki kali ban kit ia ki jaboh jabain ha kajuh ka por na ka liang jong ki bor ka District Administration ki long kiba peitngor ba kan don ka jingshongshngain.
