Gangtok, Lber 12: U Myntri Rangbah ka jylla Sikkim u Prem Singh Tamang (Golay) u la ïakren bad ka kynhun ki nongthoh khubor na ka jylla Meghalaya ha ka jingïalang bam ja miet kaba la pynlong ha ïing sah jong u ha Gangtok hynnin ka sngi.
Ha ka jingïakren, u Golay u la kren sani shaphang ki jingthmu ba iadei bad ka roi ka par jong ka Sikkim, ki sienjam bapher bapher ba iadei bad ka jingsynshar bad ki sienjam ba la shim da ka sorkar jylla ban kyntiew ïa ka roi ka par kaba iaineh, ka jingpynneh pynsah ïa ka mariang bad ka bha ka miat ha ka imlang sahlang.
U la sngap katba ki dkhot jong ka kynhun ki la batai shaphang ki kam ha ka jylla Meghalaya, kynthup ïa ka jinglong jingman jong ki lad pathai khubor, ka jingkiew ha ka imlang sahlang ka ioh ka kot bad ka lad kaba don ha ka kam jngohkai pyrthei.
U Golay u la ban jur ia ki katto katne ki sienjam ba kongsan jong ka sorkar jylla, kynthup ia ka Mero Rukh Mero Santati, ka sienjam ba thymmai jong ka Sorkar Sikkim kaba thmu ban pynkhlain ia ka jingiadei hapdeng ki kmie ki kpa, ki khun bad ka mariang. Hapoh kane ka prokram, la thung 108 tylli ki dieng na ka bynta uwei pa uwei u khunlung ba dang kha ha ka jylla.
Ka sienjam ka pyniasoh ia ka jingkha ia u khunlung bad ka jingpynneh pynsah ia ka mariang bad ka pynshlur ia ki longiing ban sumar bad iada ia ki dieng katba u khynnah u nang heh nang san. Ka jingmut ka pyni ïa ka jingmut ban rakhe ïa ka jingwan u khunlung katba ha kajuh ka por ka noh synñiang sha ka jingpynneh pynsah ïa ka mariang bad pynkhlain ïa ka jingkut jingmut jong ka jylla na ka bynta ka lawei kaba kham khuid.
U la kren ruh shaphang ka jingdonkam ban pynshlur ïa ka jingkha khun ha ka jylla, da kaba ong ba ka Total Fertility Rate (TFR) ha Sikkim ka la sakhi ïa ka jinghiar. Ha kaba iadei bad kane, ka sorkar jylla ka la wanrah ïa ki sienjam ai jingmyntoi bad ki lad jingkyrshan bapher bapher kiba thmu ban pynshlur ïa ki longïing bad ban pynthikna ïa ka bha ka miat jong ki longkmie bad ki khunlung.
Ha ka jingïakren, u Golay u la pynkynmaw biang ïa ka polisi jong ka sorkar jylla ban ym ailad ïa ki kam dih drok, da kaba ban jur ba la shim ïa ki sienjam kiba tyngeh ban tehlakam ïa ka jingkhaii drok bad ka jingdih drok, khamtam hapdeng ki samla. U la ban jur ba ki jylla ha kylleng ka thain shatei lammihngi ki dei ban iatreilang ban pynduh ia ka jingma jong u drok na kane ka thain.
U Golay u la kren ruh shaphang ka jingkiew ka jingwan ki nongjngohkai pyrthei sha Sikkim, da kaba ong ba ka kam jngohkai pyrthei ka la long kawei na ki rishot ba kongsan jong ka ïoh ka kot ha ka jylla. U la ong ba ka sorkar ka dang iai pyrshang ban pynthikna ba ki nongwan jngohkai kin ioh ia ka jingshem kaba shngain, kaba suk bad kaba sah jingkynmaw katba ki dang leit jngoh kai ia ka jingitynnad jong ka mariang bad ka pateng ba iadei bad ka kolshor jong ka jylla.
Haba ban jur ia ka jingdonkam ban kyntiew ia ka jingpyniasoh, u Golay u la kren shaphang ka projek lynti rel Sivok–Rangpo kaba dang iaid shakhmat, ka ban pyniasoh ia ka Sikkim bad ka lynti rel jong ka ri ha ka sien kaba nyngkong. U la pynpaw ka jingkyrmen ba ïa kane ka projek yn pyndep shuwa u snem 2027, ka ban pynsuk shibun ïa ka leit ka wan ha ka jylla Himalaya.
Ha ka jingïakren, u Golay u la ban jur ruh ïa ki sienjam ba iadei bad ka bha ka miat ba la ai sha ki nongthoh khubor ha Sikkim, kynthup ïa ki skhim bai bam tymmen bad kiwei kiwei ki jingmyntoi ha ka imlang sahlang, bad u la kylli shaphang ki kyndon kiba kum kine kiba lah ban ïoh na ka bynta ki nongthoh khubor ha Meghalaya. U la ban jur ia ka bynta kaba kongsan kaba ki nongthoh khubor ki don ha kaba pynkhlain ia ka synshar paidbah bad ban pyniasoh ia ka sorkar bad ki briew.
Ki dkhot jong ka kynhun ki nongthoh khubor kiba la leit jngoh ki la iaroh ia ka roi ka par bad ka rukom synshar jong ka Sikkim, da kaba ban jur ïa ka jingpynleit jingmut jong ka jylla ha ka rep ka riang ka bym pyndonkam dawai, ka jingpynïaid ïa ki kali kaba paka, ka jingkhuid jingsuba, ka jingshngain bad ka jingsynshar kaba bha. Ki la iaroh ruh ia ka jingkylluid mynsiem bad ka jingsbun ki briew jong ka jylla Sikkim.
Kane ka kynhun ka kynthup ïa ki nongthoh khubor kiba mihkhmat ïa ki print, elctronic bad digital media na ka jylla Meghalaya bad ka dang leit jngoh ïa ki katto katne ki jaka treikam bad ki jaka ba kongsan ha kylleng ka jylla Sikkim kum shi bynta jong ka ‘Exposure Tour’ ba la pynlong da ka Press Information Bureau Shillong ryngkat ka jingïatreilang bad ka Press Information Bureau Gangtok.
Ia kane ka kynhun la ialam da u Gopajit Das uba dei u Assistant Director ka Press Information Bureau Shillong, ha ryngkat u Manas Pratim Sarma uba dei u Assistant Director ka Press Information Bureau Gangtok uba la iarap ia kane ka prokram ha kane ka jylla. Ka Annapurna Alley, IPR Secretary, u Yougan Tamang, Press Secretary sha u Myntri Rangbah, bad u Sunil Mothey, IPR Director ki la iadonlang ha kane ka sngi.
