Shillong, Lber 13: Ka National Institute of Fashion Technology (NIFT), Shillong ka la pynkut noh ia ka Fashion Spectrum 2026 kaba ju long man u snem lyngba ka jingialang kaba rakhe ia ka sap, ka jingiatreilang bad ka jingtbit ha ka jingsaindur. Kane ka prokram kaba ar sngi ka la sakhi ia ka jingiashim bynta da ki samla pule jong ka NIFT bad kiwei kiwei ki jaka treikam kaba la pynkylla ia ka jaka treikam jong ka NIFT sha ka jaka na ka bynta ka jingiakhun bad ka jingiasam ia ka jingsaindur.
U Bah Frederick Roy Kharkongor, IAS, Principal Secretary, ka tnat kam jain jong ka Sorkar Meghalaya, u la iaroh ia ka thup ‘ZAP!’ kum ka dak jong ki jingbun bynta bad ki lad mynta na ka bynta ka jingsaindur. U la kren shaphang ka jain Ryndia jong ka Meghalaya kaba la ioh ia ka GI tagging, kaba long ka jain ka bym ktah ia ka mariang haba pynmih ia ka da ki nongsaindur kiba long ki longkmie.
U la ai jingmut na ka bynta ka khusnam “Best Designer Award of Meghalaya” ban ai mynsiem ia ki designer ba kin pyndonkam ia ki jain ba ioh ha kane ka thain. Haba kren ia ki samla pule, u la pynshlur ia ki ban long ki nongprat lynti, kiba bud ia ka jingwad bniah bad ka jingsaindur, ha kaba u la ong ba ki dei kiba lah ban pynkylla dur ialade bad kiba wanrah ia ka jingshai bad kiba ai mynsiem lyngba ka jinglong jong ki.
Ha ka jingkren jong u, u Satinder Kumar Bhalla, ITS, Secretary jong ka North Eastern Council (NEC), u la ong ba baroh kawei ka jingim jong u ka long kum ka ‘fashioh show’ ha kaba ki briew ki bteng ban pyni ia ka jinglong jong ki lyngba ki kam jong ki.
Ha kaba iadei bad ka thup ‘ZAP!’, u la ong ba kane ka dei ka “Zile Abhi Ka Pal, Kal Ho Na Ho,” bad ua la pynshlur ia ki samla pule ba kin don ka jingim kaba peit ia ka por mynta bad kiba shim lut ia ki lad kiba ki don. Da kaba kdew sha ka jingriewspah jong ka jingiar ka India, u la pynshlur ia ki ba kin rakhe bad pdiang ia ka deiriti tynrai jong ka ri bad kan pyni ia ka jinglong kyrpang jong ki kolshor ba bun jong ka.
U Brigadier Vikas Rai Shandilya, Commandant, Assam Regimental Centre, Shillong, Aimeka Dkhar, Asst Director Cottage Industries bad ka S.Kharpran Functional Manager, DCIC, Shillong, ki la iadon lang ha kane ka sngi.
Ka prokram ka la kut da ka jingpynbna bad jingai khusnam ia ki nongjop ha ki jingiakhun bapher bapher. Ka la don ka jingiarisa ha kane ka jaka katba ki nongiashim bynta ki la ioh ia ka jingithuh na ka bynta ka jingsaindur, ka jinglong ryntih bad ka mynsiem iakhun jong ki. Kane ka prokram ka la pyni ia ka jingtbit jong ki samla pule bad ka la pyni ia ka jingkongsan jong ka jingiatreilang bad ka jingsngew sarong shaphang ka jaka treikam. Ka mat ba kongsan jong kane ka prokram ka la long ka fashion show, kaba long ka dak jong ka jingkut jong ka Fashion Spectrum 2026.
U Campus Director, Dr. Brijesh Deore, u la ong “Ka Fashion Spectrum ka pyni ia ka jingkhlain jong ki kam ai jinghikai jong ngi. Ka jingshit rhem, ka jinglong ryntih bad ka jingiatreilang ba la iohi na ki samla pule jong ki ka pyni biang ia ka jingkhlain jong ka rukom ioh jinghikai lyngba ka jingpyrshang dalade ha ka NIFT Shillong. Nga kitbok kitrwiang ia ka kynhun ba la pynlong ia kane, ki nonghikai, ki nongtrei bad ki samla pule kiba la pynkhreh ia ka prokram kaba heh bad kaba don jingktah haduh katne.”
Katba kane ka prokram ka la poi sha kaba kut, ka NIFT Shillong ka la dap da ka bor treikam kaba thymmai, ka jingiatrei lang bad ka jingngeit skhem ka ban bteng ban ai mynsiem ia ka NIFT Shillong ha kine ki por ki ban wan.
