Tura, Kyllalyngkot 23: Ki seng bhalang na garoHills kin pynlong ia ka jingialang paidbah ha Tura ha kane ka sngi saitjain ban wan na ka bynta ban khot ia ki seng bhalang ba kin wan noh sha ka jingiakren ia suk bad ka sorkar bad ba kin sangeh noh ia ki kam pyntriem jong ki.
Kine ki seng bhalang kila rai ba ha kane ka sngi kin sa shim ia ka rai ba kyrpad ia baroh ki seng lehnoh kiba don ha Garo Hills ba kin sangeh noh ia ki kam pyntreim jong kib ad ba kin wan sha ka jingiakren ia suk, ki seng bhalang kiba la dep ban pynthikna ba kin wan ki long na Tikrikilla, Baghmara, Dainadubi, Phulbari bad Ampati.
Na ka liang jong ki seng bhalang kila kyrpad ia ki paidbah ba kin wan ban ia shim bynta ha kane ka jingialang kaban long ha Tura , kane ka jingialang kan long kaba jop tang lada ki paidbah ki mih sha khmat. La ong ba ka sorkar bad ki pulit kim lah ban lei lei lada ki paidbah kim ia snoh kti lang.
Ki seng bhlang ki kyntu ia ka sorkar ba ka dei ban khot ia kren ia baroh ki seng lehnoh kiba don ha Garo Hills, hapoh ka lama jong ka ANVC, ha ka juh ka por kane ka seng lehnoh kaba don mynta ha pdeng ka jingiakren ia suk bad ka sorkar ka dei ban khot ia kiwei de ki seng kaikhlaw ba kin ia wan lang ha ka jingiakren bad ka sorkar. Lada kim lah ban leh ia kane kan nym don jingmyntoi ban ia kren ia suk.
Bun na ki nongialam jong ki seng bhalang ki kyrmen ba ki seng lehnoh na ka Garo Hills kin sangap ia ka jingkyrpad jong u paidbah na ka bynta ban wanrah ia ka jingshong suk shong sian ha katei ka thain jong ka jylla Meghalaya.(SP News)
