Shillong, Lber 16: Ka ophis jong u Deputy Commissioner ka Ri Bhoi District kala weng kam 6 ngut ki Asha kiba hap hapoh jong ka Ri Bhoi District halor ka jingkynnoh ba ki khlem trei kam bha, ia kane la lah da ka jingiakren lang bad ka ophis District Medical Health Officer ka Ri Bhoi District.
Halor kane ka jingshah wengkam ka seng Meghalaya Asha Union mynta ka sngi ka 16/Lber/2026 kila leit ban ia kynduh ia u Abhilash Baranwal Deputy Commissioner ka Ri Bhoi District halor kane ka jingweng kam syndet ia ki Asha khlem da ai da ka jingthoh ia kaba la shu pyntip lyngba ki rangbah shnong.
Ka kong Sony Kharjana ka nong aibuid ka union kala ong ba ha kane ka jingiakynduh kila ai ia ka dorkhas sha u Deputy Commissioner bad kila ia kren ia kane ka jingshah wengkam, ha ka jingiakren la ong ba ka jingweng kam ka dei namar kim shym la trei bha ia ka kam.
Ka jingkylli ka long lada u DC u lah ban weng kam ia kiba khlem treibha balei ym lah ban pynbeit ia ka jingshah weng kam kiba trei bha ha ki rangbah shnong la kylli ka nongai buid ka Union kaba kila buh hakhmat u DC ha kane ka jingiakynduh mynta ka sngi.
Ha kane ka jingiakren ki nongialam ka Union kila dawa lada dei ban weng la dei ban ai da ka jingthoh la kumno kumno lai bnai shuwa ba kin lah ban trei bha ia ka kam, namar por ba ki don kam ki khroh ban wan trei bad ynda ki beh pat khlem ai kano kano ka jingpyntip.
Ha kane ka jingiakren u DC u la ai ka jingkular ban thoh sha u DMHO ba shuwa ban shim ia kano kano ka rai ban weng kam dei ban da pyntip sha ki da ka shithi la kumno kumno kan long lai bnai shuwa, ka jingeh ka long ba ia ki shithi la phah sha ki rangbah shnong ym sha ki Asha. Ha kane ka jingiakynduh ki nongialam ka Union kila dawa ba kidei ban pynioh ia ka bainong kaba ki Asha kila trei.
