Shillong, Lber 17: Ka tnad 
Telecommunications (DoT) jong ka Sorkar India ka la plié paidbah bad pyntreikam ia ka sienjam CHAKSHU, ka jingai jingshakri hapoh ka rynsan Sanchar Saathi, ban ialeh pyrshah ia ki kam thok lyngba ki kam telecom bad ruh ban pynkhlain ia ka jingiada ia ki briew.
Naduh ka jingpyntreikam ia ka CHAKSHU ha Meghalaya, ki la don katto katne ngut ki briew kiba la ai jingtip shaphang ki jingsuba ba don ki jingpyrshang ban thok ia ki briew da kaba pyndonkam da ki lad telecom. Kine ki jingai jingtip ki la plié lad ban peit bniah, ka jinglap ia ki rukom treikam ban thok ia ki briew, bad ban shim ia ki sienjam bad ki Telecom Service Provider bad ki kynhun kiba pyntreikam ia ka ain, kaba la pynkhlain ia ka jingshngain jong ki kam telecom ha kane ka jylla.
Kane ka jingiashim bynta ha ka rynsan CHAKSHU ka pyni ia ka jingsngewthuh kaba dang kiew ha ki briew bad ka jingiatreilang hapdeng ki telecom service provider, ki pulit jong ka jylla bad ka tnad Telecommunications.
La saindur ia ka CHAKSHU ha ka rukom kaba suk ban pyndonkam kaba plié lad ia ki briew ban ai jingtip shaphang ki jingsuba jong ki ba don ki jingpyrshang ban thok briew, ki spam message, bad ki web link kiba wanrah ia ka jingsniew kiba wan lyngba ka jingphone da ki briew, ki sms, WhatsApp, social media lane ka jingpyndonkam ia ka internet.
Lyngba kane ka sienjam, ki briew ki lah ban ai jingtip shaphang ki kam kum ka jingthok ba dei ki ophisar Sorkar, bank ne pulit, ki skhim kynshew pisa kiba shu thok, ki jingthok kiba iadei bad ka KYC lane ka jingai jingsiew, ki link phising lane ki application kiba wanrah ia ka jingsniew.
Ka rynsan ka ailad ruh ïa ki nongpyndonkam ban pyntip shaphang ki jingtyrwa kiba kim kwah, kynthup ïa ki jingphone spam ne ki message ba la ïoh khlem ka jingmynjur. La kyntu ia ki nongshong shnong ban pyntip ia kum kine ki jingjia hapoh hynriew sngi khnang ban lah ban leh ia kaba donkam ha ka por kaba biang bad kaba thikna. Kine ki jingai jingtip ki iarap ia ka tnad Telecom bad ki telecom service provider ban ithuh bad khanglad ia ka jingpyndonkam bakla ia ki lad telecom bad ban pynkhlain ia ki lad jingiada ha ka kam cyber.
Hynrei ka CHAKSHU kam dei na ka bynta ban pyntip shaphang ki kam kiba iadei bad ka jingduhnong ha ka liang ka pisa tyngka ne ki kam cybercrime. Ia kum kine ki jingjia dei ban pyntip lyngba ka national cybercrime helpline 1930 lane ha ka National Cyber Crime Reporting Portal.
Lyngba ka sienjam CHAKSHU, ki briew ki lah ban, Ai jingtip shaphang ki jingiakren kiba pyrshang ban ialam bakla, ki jingtyrwa kiba khlem ioh jingbit, bad ki web link kiba ym sngew shnaniah. Iarap ia ki bor ban lap ia ka jingpyndonkam bakla ia ki jingdon jingem telecom. Noh synniang sha ka jingiada na ki kam thok pisa bad cybercrime.
Ka sienjam CHAKSHU ka don ka bynta kaba heh ha ka jingiada ia ki briew na ki kam thok lyngba ki lad telecom, ka jingpynduna ia ka jingpyndonkam bakla ia ki rynsan iakren briew, bad ka jingpynkhlain ia ka jingshngain ha ka ri ha kaba iadei bad ki kam digital.
La kyntu ia ki briew jong ka ri ba kin ai jingtip shaphang ki jingsuba ba don ki kam thok lyngba ki lad telecom lyngba ka CHAKSHU kaba don ha ka rynsan Sanchar Saathi: https://www.sancharsaathi.gov.in/.
