New Delhi, Lber 18: Ka Khasi Students’ Union (KSU) Delhi Unit, lyngba ka jingiatreilang bad ka Special Police Unit for North East Region (SPUNER), ki la lah ban pyllait ia ki arngut ki khynnah kynthei Khasi Pnar kiba la ngat ha ka jingriam jong ki nongkhaii briew kiba thok da kaba kular ai kam.
Kine ki arngut ki khynnah, iwei iba dang 15 snem ka rta bad iwei iba 18 snem, ki dei kiba na East Jaintia Hills, Meghalaya. Kat kum ka jingtip, la ialam ia ki sha nongbah Delhi da iwei i paralok iba dei hi na Meghalaya iba treikam ha Delhi, khlem ka jingtip ne ka jingbit ki kmie ki kpa. La pynshoi ia ki da ka jing kular ban ioh kam kum ki nongtrei hapoh iing (domestic help).
Haba la poi ha Delhi, ia kine ki khynnah la ialam pynban sha kawei ka Spa ha Haryana. Hangta, la pynbor ia ki ban rung sha ka kam khaii die met. Namar ka jingsheptieng, kine ki khynnah ki la ioh ban phone sha la iing, bad ka longing jong ki pat ka la pyntip mardor sha ka KSU Delhi Unit ban pan jingiarap.
Ka KSU Delhi Unit ka la pyntip mardor sha ka kynhun SPUNER. Lyngba ka jingiatreilang ba khlain, ka KSU bad ka SPUNER ki la lah ban lap bad pyllait luid ia kine ki khynnah na katei ka jaka ha Haryana.
Ka KSU Delhi Unit ka phah ka jingsngewnguh sha baroh ki dkhot kiba la shim bynta ha kane ka kam ban iada ia ka jingim briew. Ngi phah ka jingsngewnguh kaba kyrpang sha i Ma’am Sabrina, ARC Meghalaya House, namar ka jingiarap ba ryntih, bad sha i Sir Nabam Gungte, Joint CP, SPUNER, namar ka jingialam kaba nep.
Nangta, ka Union ka ai burom ruh ia ka jingshlur bad ka jingtrei shitom jong ka kynhun Rescue Team jong ka SPUNER kiba la don ha madan ban pynshngain ia kine ki para jong ngi,Sub Inspector Ngalung Wung, ASI Naveen Kumar, HC Satish Kumar bad W/CT Lalrinhluni
“Kane ka jingjia ka long ka jingmaham kaba khraw ia ka jingma kaba ki samla jong ngi ki lah ban iakynduh haba ki leit wad kam wad jam shabar,” la ong u Samla Marbiang Khongwir, President ka KSU Delhi Unit. “Ngi kyntu ia baroh ki kmie ki kpa bad ki samla ban long kiba phikir bad kiba sumar bha na ki jingpynshoi ki nongthok kiba kular kam ban ioh kam. Ka KSU ka ieng skhem beit ban iada ia ka bit ka biang jong ka jaitbynriew Khasi ha Delhi-NCR.”
Ka Union ka dang iatreilang bad ki bor sorkar ban pynbiang ia ka jingpynshngain (counseling) bad ban pynpoi biang ia kine ki khynnah kynthei ha la ki longïing hapoh Meghalaya.
