Shillong, Lber 18: Ka Tnad Pule Puthi mynta ka sngi ka la plie paidbah ia ka rynsan pynrung kyrteng online na ka bynta ka Yuva Sangam – Phase VI hapoh ka sienjam Ek Bharat Shreshtha Bharat (EBSB). “Yuva Sangam” kadei ka prokram jong ki samla ba kyrpang jong ka Tnad Higher Education, Sorkar India, kaba thmu ban pynkhlaiñ ïa ki jingïadei bad kyntiew ïa ka jingïasngewthuh hapdeng ki samla nongshong shnong na ki Jylla bad ki Union Territory bapher bapher. Ka sienjam ka kyntiew ia ka mynsiem jong ka “Ka jingiatylli hapdeng ka jingiar” da kaba plie lad ia ki jingleit jngoh hapdeng ki Jylla/UT ba la pyniasoh lang.
Ha ka kabu kaba heh na ka bynta ki samla ha Meghalaya, ka Indian Institute of Management Shillong kan long kum ka jaka kaba pyntreikam na ka bynta ka Jylla hapoh ka Yuva Sangam – Phase VI, ka prokram ia ki samla kaba kyrpang jong ka Tnad Pule Puthi hapoh ka sienjam Ek Bharat Shreshtha Bharat (EBSB). Hapoh kane ka bynta, ka Meghalaya ka la ïasoh bad ka Telangana, ha kaba ki nongïashim bynta na ka Jylla kin leit jngoh ïa ka National Institute of Technology Warangal kum shi bynta jong ka jingsakhi mar kylliang ia ka kolshor bad jingnang jingstad kaba jylliew.
Ki samla kiba don ha ka rta 18–30 snem, kynthup ïa ki samla pule jong ki jaka pule ba kham shalor, ki nongtrei mon sngewbha jong ka NSS/NYKS, bad ki samla kiba la trei kam, ki lah ban aplai lyngba ka rynsan ha: https://ebsb.aicte-india.org bad https://ekbharat.gov.in
Ka Yuva Sangam Phase-V kaba la dep ka la sakhi ïa ka jingïashim bynta kaba shitrhem, ha kaba la ïoh pdiang palat 46,000 tylli ki jingpynrung kyrteng na kylleng ka ri. Naduh ba la sdang ïa ka, palat 6,000 ngut ki samla bad ki nongpynïaid ki la ïashim bynta ha ki jingleit jngoh ha kylleng ki bynta bapher bapher jong ka Yuva Sangam (kynthup ïa ka bynta ba nyngkong ha u snem 2022), ba la pynlong da ki jaka pule ba pawnam ha kylleng ka ri, kaba pyni ïa ka jingshitrhem kaba nang kiew na ka bynta ka jingpule bad ka jingïatylli ha ka ri.
Ha ka Yuva Sangam Phase-VI, 22 tylli ki jaka pule ba kham shalor (HEI) la ithuh kum ki jaka ba pyntreikam ha kylleng ka ri. Ki nongiashim bynta ba la shah jied kin leit jngoh ia ki jaka pule bad ia ka kolshor kaba san haduh hynniew sngi (khlem da khein ia ki sngi leit jingleit) sha ki Jylla/UT ba la pyniasoh lang bad ki.
Ia kane ka prokram la pynbeit hapoh ki san tylli ki rishot ba kongsan — ki 5 tylli ki Ps: Paryatan (Ka kam jngohkai pyrthei), Parampara (Ki Dustur & Kolshor), Pragati (Ka roi ka par & jingsynshar), Paraspar Sampark (Ka Jingïadei hapdeng ki briew), bad Prodyogiki (Ka Teknoloji & Jingsaindur thymmai).
Lyngba kine ki rishot, ki nongiashim bynta ki sakhi dalade shaphang ka kolshor, ki sienjam ba iadei bad ka roi ka par, ka jingkiew ha ka teknoloji, ki shnong ki thaw, bad ki jaka pule, kaba iahap bad ki jingthmu jong ka National Education Policy (NEP) 2020.. La pyntreikam ia ka Yuva Sangam lyngba ka rukom iatreilang jong ka Sorkar Baroh kawei bad ka jingkyrshan na ki Tnad sorkar pdeng/ki Tnad/ki Agency, ki sorkar jylla, bad ki HEI kiba pyntreikam.
