Shillong,Lber 19: U Myntri rangbah ka jylla u Conrad K. Sangma mynta ka sngi 19/Lber/2026 u la ia kynduh ia u Lat ka jylla u C.H. Vijayashankar ha Lok Bhawan Shillong ha kane ka jingiakynduh u myntri rangbah ka jylla u la pynsngew ia ki jingjia kiba la jia ha Garo Hills ha kine ki sngi ba la dep kiba la poi haduh u pud ban pynsangeh noh ia ka elekshon MDC sha ka iing dorbar jong ka Garo Hills Autonomous District Council.
Haba kren ha ki lad pathai khubor hadien ba la ia kynduh ia u Lat ka jylla u myntri rangbah u la iathuh ba ha kane ka jingiakynduh ba u la batai ia kaei kaba la jia bad mynta u la kham sngewthuh shuh shuh ha kaba ia dei bad ka jinglong jingman ha Garo Hills.
Haba ia dei bad ka jingshah kem jong ki briew kane ka dei ka bynta jong ki pulit katkum ki sabut kaba ki don ha ryngkat ki rule ki kyndon kila leh ia la ka kam u myntri rangbah u la ong katno ngut kila shah kem bad kiei kiba lah shah kem ia kata um don jingtip namar kane ka dei ka kam jong ka tnad pulit kiba peit ia ka shongsuk shongsain.
U myntri rangbah u la ong ba mynta kam don shuh kata ka jingiakynad hynrei na ka liang jong ka sorkar ka long kaba peitngor ban pyntikna ba kan don ka jingshongsuk bad ki briew mynta kila ialeit iawan ban bteng ia la ki kam ki duk bad la weng ruh ia ka jingpakhang kine ki long ki dak ki shin ba ka shongsuk shongsain kala sdang wan biang.
