Shillong, Lber 20: Mynta ka sngi u Superintendent ki pulit ka East Khasi Hills District u Bah Vivek Syiem IPS, la ong ba ki pulit kila ioh ha Social Media kawei ka Video kaba khynnah rit ha pdeng 4 haduh 5 snem u la niah ia ka bike ba pyndon kam da u battery ha surok bah.
Ka jingkylli ka long ka jingshah ia ki khynnah ban niah ka buh ha ka jingma bad kane ka pynkhein ia ka kyndon kaba 4 jong Motor Vehicles Act, 1988. Namar ki khynnah kim lah ban antad ia ka jingiaid sted ki kali,kim tip ia ki sign bad iaki dak bad ka jingrit ka bike ka pynlong ba kin nym iohi bad kane kan wanrah ka jingmynsaw.
Ia ki khynnah kiba hapoh ka 18 snem kim dei ban niah kali ha ki surok paidbah, ki lah ban niah tang ha ka jingpeit kiba heh kata ruh tang ha ki jaka lehkai kum ha Park, ki madan lehkai ha phyllaw iing.
Ki pulit jong ka Shillong Traffic Police (STP) kila shim ia kane ka ba ka dei kaba beain bad ka jingpynshitom kan long hapoh ka kyndon 199A jong ka ain Motor Vehicles Act(amended 2019) da kaba set phatok bad ka kuna kaba T.25000/- tyngka.
