Shillong, Lber 21: Mynta ka sngi u Dr. Mukul Sangma nongialam ka liang pyrshah ha ka iing dorbar thawain ka jylla u la leit ban ia kynduh ia u Lat ka jylla halor ki jingjia ha Garo Hills ha kine ki sngi kiba la dep bad u la ai ia ka dorkhas ha u Lat ka jylla.
Haba kren ha ki lat pathai khubor ha dien ka jingiakynduh ia u Lat la ong ba ka jingkhmih lynti ban weng ia kane ka jingeh kaba ki paidbah ki dawa u nongialam ka liang pyrshah u Dr. Mukul Sangma u la ong ba u iohi ba ka don ka lyntiba lah ban leh pynurlong ia kane ka jingdawa jong ki paidbah.
Ha ka juh ka por u la ong ba ka don pat ka jingsngewkhia ha kaba ia dei bad ka jingleh ha kaba ia dei bad ka jingjia khamtam eh ha kaba ia dei bad ka thwet kibor ia ki nongialam kiba la shah kynnoh ba ki don bynta katkum ki skhi kaba ki don leh se bad ki bor jong ka ain.
Ka don ka jingsuba kaba baroh ki sngew ba ki bor jong ka ain ki kem na phang khlem da bishar bniah ia ka jingdon bynta ka jong ki, kum kane ka jingleh kan ialam bakla ha kaba ia dei ka jingbishar ban ioh ia ka hok.
Ka don ruh ka jingma ha kaba kiba lui lui kin shu shah pharep khlem daw katba ia kiba leh ia ka kam pat yn mym lah ban shem ia ki kane ka jingleh ban kem leh se tang ban tem ia ka jinghuri hura ka lah ban wanrah pynbna ia ka jingbyn shngian ka shongsuk shongsain.
Man ki kam ba leh da ki bor jong ka ain dei ban peit ba leh da ka jingshaniah khlem da leh shiliang bad la leh ha kaba shitbashai da ka jingthmu ban pynthikan ban ai ia ka jingbishar hok ha ka por kaba biang khlem da don kano kano ka jingiashah ne ka jingthmu sniew.
U Nongialam ka liang pyrshah u la ong ba un sa shim ia kane ka mat bad u myntri rangbah ka jylla bad na ka liang jong u shimet bad ki para MLA ki sngew ba dei ban don ka kynhun tohkit kaba laitluid ban tohkit ia ka jingjia ha Garo Hills hapoh ki kyndon jong ka ain Commission of Inquiry Act 1952 ba kan peit bniah kane.
Kan long ba ka sorkar ka long shisha kaba shai bad ban lap ia ka jingshisha barohban nym don shuh kano kano ka jingpyrkhat sniew da kumwei pat, ia kane dei ban ia kren bad haba don ka jingthoh kit kaba khuid kan wanrah ia ka jingshaniah na ki paidbah bad ka jingtohkit kan long na baroh ar liang.
