Shillong,Lber 23: Ka Khasi Jaintia Presbyterian Assembly kan pynlong ia ka Gospel Musical Evening bad Food Fest, ka ba la ai kyrteng ‘Hosanna 2026’ ha ka 28 tarik u Lber 2026, sngi Saitjaiñ, ha madan Jrisaleiñ, Jowai.
Haba kren ha ki lat pathai khubor ha Shillong Press club mynta ka sngi 23/Lber/2026 u Rev. Pastor S. Diengngan Administrative Secretary KJPA ba dei peit ia ki kam Mission bad ban ialap sha bar jong ka ri, la ong ba kan don ka jingiatem ia put ha ka por janmiet bad ka jingdie ia ki bam ka ban sdang naduh 1 baje noh phaisngi haduh ban da kut ka Concert ka ban sdang ha ka por 4 baje janmiet.
Ka jingthmu jong kane ka free music concert ka long kum shi bynta ban ai ka jingkyrshan bad pyntyllun ia ki kam Mission jong ka KJP Assembly. Ha kane ka Gospel Concert, ki don ki nongrwai bad nongtem kiba don ki sap kyrpang ban rwai ia ki jingrwai kiba kynsai bad ban pynkhih ia ki mynsiem jong ki nongieit jingrwai.
Kine ki nongrwai ki kynthup ia ka kynhun ba paw na Mizoram, ka Magdalene, Ka MANE Music Ministry, Kong Medaker Kharkongor, Elev8 Choir, Teiboklang Togper, El King, Ka Pastoral Trio kynthup ia u Rev. D.Lyngdoh, Rev.T. Dkhar bad Rev. K.Syiemlieh.
Yn pynsuhsieng ruh ha katei ka sngi da ki jingrwai jong ki Standing Choir jong ki saw tylli ki Synod, kata, ka Synod Mihngi, Synod Sepngi, Synod Pdeng bad Ri-Bhoi Synod. Kaba kham kyrpang ha kane ka kynti, ka long ka jingdon ryngkat jong ki nongrwai niam ba la paw ha ka ri.
La tip bha ia kane ka kynhun da ki sur bad rukom tem, ka ba ki khot Nu-Age sound bad ia ka jingpnah ka tem ka put jongki la bna kylleng ka ri India. Ka jingdon lang jong ka ne ka kynhun, kan pynrhem bad rah iaka jingialang ka jingshakri Blei.
Ha katei ka musical evening, yn don lang ruh kongsan, u Rev. P. Myrchiang, Moderator, KJP Synod Mighngi bad I Bah D. Langstang, kum u Guest of Honour. Yn don ryngkat ruh ki Pastor, ki Tymmen Basan bad ki dkhot jong ka Balang, ryngkat ki ban shah khot kyrpang bad ki nongkitkam jong ki Synod.
La khmih lynti ba ki da ki hajar ngut kin wan sha kane ka Musical Evening-cum-food fest ha madan Jrisaleiñ, Chutwakhu . Ka jingpynkhreh na ka bynta kane ka sngi ka lah nang iaid shakhmat, ha ryngkat ka jingiatrei lang ki volunteer, ka district adminstration bad ki bor pulit ban pyniaid beit iaid ryntih ia ki Kali bad ki jaka pynieng kali.
La sngewthuh ruh ba ka jingpynkhreh na ki Jingiaseng Kynthei ba pher ba pher hapoh ki Synod bad ruh ka KJPA English Service, Khyndai Lad, ki la long kiba biang ban wanrah ia ki jingbam kiba kynsai.
Ka KJP Assembly bad na ka liang ka jong nga kum U Convener jong ka fundraising committee Foreign Mission Board, ngi pdiang sngewbha iaphi baroh bad ngi iawer ia baroh ki riew ieit jingrwai khamtam ia ki para bangeit kiba don hapoh ka KJP Assembly ban iawan sha kane ka Hosanna 2026 Gospel Musical Evening cum Food Fest khnang ban pynurlong ia ka jingthmu kaba kongsan ka Mission bad Evangelism ban pyniar ia u pud ka jingialap shabar ri ba ia ka Gospel yn ialap sha kylleng ka jaka jong ka pyrthei.
