Shillong,Lber 24: U bah Chandame Sungoh u shongknor ka kynhun HBDRF mynta ka sngi u la pynbna ba kum ka kynhun kila rai ha ka jingialang kaba la long ha Barato ba kin nym ia shim bynta ha ka MLA elekshon ka ban sa long shen sha ka iing dorbar thaw ain ka jylla Assam.
Haba kren ha ki lat pathai khubor mynta ka sngi 24/Lber/2026 u bah Chandame u la ong ba kila don ar tylli ki elekshon kiba lah dep kaba ki khlem ia shim bynta, ha ka elekshon Member Autonomous Council bad kaba ar ka dei ka MP elekshon bad mynta kane ka MLA elekshon.
U shongknor ka HBDRF u la ong ba ki para doh para snam la ki don ha kano kano ka party ki dei ban tip ba kitei ki jaka ki dang don hapdeng ka jingiakajia pud bad kumba la rai dei ban sngewthuh ba kim dei ban pynshoi ia ki para briew lajong ba kin leit thep vote ha kane ka elekshon MLA ha Assam.
U bah Chandame u la kynnoh ba jingshah lehbein ka long da ka jingthmu ban beh noh namar ka jylla Assam kam donkam ia ki briew ka donkam ia ki jaka, haba mynta kim lah shuh ban beh mynta ki sdang ban pynbiej da ki kam pynroi bapher bapher bad ia kane la iohi ha ka jingleh u CEM ka Karbi Anglong.
