Shillong, Lber 27: U myntri rangbah ka jylla u Conrad K Sangma mynta ka sngi ula leit ban ia donlang ha ka sngi kut ka taiew leh kmen ki samla pule ka Synod College kaba la long ha madan student Jaiaw bad ha kane ka sngi la rakhe ruh iaka Diamond Jubilee ka college.
Haba kren ha ki samla pule u myntri rangbah la ong ba ka jingpynlut kaba kongsan tam eh ka long ban kyntiew iaki samla kata ka dei ka pule puthi bad ka sorkar kala buh ia kane ka bynta kaba hakhmat eh kum kawei na ki mat treikam.
Haba phai sha ka college ula ong ba ia ka la sdang ha ka jingsdang iba rit hynrei da ka jintrei shitom ki nongialam ka Balang kane ka college kala kiew kum ba ka long mynta bad iaka jingkiew jong ka la lah ban thew ha kaba uwei na ki myntri rangbah ka jylla bam kwai ha dwar u blei u bah J.D Rymbai udei uwei na ki samla pule na kane ka college.
Ha kane ka sngi haba kren shaphang ki samla ula ong ba ka jylla ka don mar shiteng ki paidbah nongshong shnong kiba la 18 snem bad hapoh 20 snem bad kine kin long shisha ki jingkhlain bor jong ka jylla u myntri rangbah ula kren bynniaw iaka jingkiew ka jingdon kiba dih droks bad kiba ioh ia ka jingpang niangkulia kumta ula kyntu ban long kiba adkar ban lait na kine kiei kiei.
Haba phai sha ka iohkam iohjam man la u snem ki don 60,000 hajar ngut ki samla kiba la rung ha ka kyrta wad kam wad jam, hynrei ki kam ba la lait ha ka sorkar ha ka shi snem ki long tang hapdeng 1,000 bad 2,000 tylli, ka jingkylli shaei ki 58,000 hajar ngut kin leit ka jubab ia kata ka long ba ki samla kin pyntbit ia lade ha ki kiwei pat ki kam kaba ka sorkar ka ai jingkyrshan bad u kyntu ia ki samla ba kin bat ia ka akor ka burom.
