Shillong, Lber 27: Ka Inter-Media Publicity Coordination Committee (IMPCC) Meeting ka la long mynta ka sngi ha Shillong, hapoh ka jingpeit jong ka Press Information Bureau, Shillong ha kaba la iadonlang ki nongmihkhmat na ki tnad bapher bapher jong ka Sorkar Pdeng, ki jaka pule ba kham shalor, ki lad pathai khubor, bad ki seng kiba iadei bad ka kam iada ri bad ki kam paidbah ban pynkhlain ia ka jingiatreilang bad kyntiew ia ki rukom treikam ba iadei bad ka jingai jingtip paidbah.
Haba ai jingkren ha kane ka jingialang, u Kripa Shankar Yadav, Additional Director General (NEZ), Tnad Information & Broadcasting u la ban jur ba ka rynsan jong ka IMPCC ka long ban kyntiew ia ka jingiakren kaba man ka por, ka jingiadei, bad ka jingiatreilang hapdeng ki tnad.
U la ban jur ia ka jingdonkam jong ki sienjam ai jingtip ba ryntih bad u la kren shaphang ka bynta jong ka Press Information Bureau (PIB) bad ka Central Bureau of Communication (CBC) kum ka rynsan ba la buh kyrpang ban pynphriang ia ki jingai jingtip jong ka sorkar bad ban peit ia ka jingiadei bad ki paidbah ha ka rukom kaba paka.
U la kren ruh halor ka jingpynbeit ia ki jingeh jong ki lad pathai khubor, kynthup ia ka jingpynbna kaba ialam bakla, bad ban jur ia ka jingdonkam ban don ka jingiatreilang kaba kham bha hapdeng ki ophis jong ka Sorkar Pdeng bad pynshlur ia ki tnad ban iatreilang bad ka PIB bad kiwei kiwei ki lad pathai khubor, kynthup ka Doordarshan bad Akashvani, na ka bynta ka jingai jingtip kaba kham iar. U la ai jingmut shuh shuh ban pynlong man ka por ia kum kine ki jingiakren ban pynthikna ia ka jingiadei kaba iaineh bad ka jingiakren kaba don jingktah.
Haba pdiang sngewbha ïa ki nongïashim bynta, u Gopajit Das, Assistant Director ka PIB Shillong, u la ban jur ïa ki jingthmu jong kane ka jingïalang bad pynpaw biang ïa ka bynta jong ka PIB ban pynneh ïa ka jingïadei kaba skhem bad kaba ïajan bad ki lad pathai khubor ha ka jylla. U la batai bniah shaphang ki kam jong ka PIB, kynthup ïa ka jingpynlong ïa ki Varta bad ki Vartalap, bad u la kyntu ïa ki tnad ban pyndonkam ïa kine ki rynsan na ka bynta ban kyntiew ïa ki sienjam jong ki.
U la ai jingtip ruh ia ki nongiashim bynta shaphang ki sienjam ai jingtip ia ki lad pathai khubor kum ki press tour, kiba pynsuk ban ioh jingtip shaphang ki kam kiba iadei bad ka roi ka par lyngba ki nongthoh khubor na kylleng ri.
La pynlong ia ka jingpynithuh ha kane ka jingialang, ha kaba ki nongmihkhmat na ki tnad bapher bapher ki la iasam ia ki bynta jong ki, ki jingthmu, ki sienjam kiba dang iaid shakhmat, bad ki jingeh kiba ki iakynduh ha ka jingiakren bad ka jingai jingtip. Ka jingiakren ka la pynleit jingmut ha kaba tei ia ki lad pyniadei kiba kham khlain bad ban kyntiew ia ki rukom pynphriang khubor kiba iasoh lang.
U Public Relations Officer jong ka Assam Rifles u Lt Col Vikas u la ïaroh ïa ka rynsan jong ka IMPCC kum ka sienjam kaba kongsan, da kaba ong ba kum kine ki jingïalang ki pynsuk ïa ka jingïakren bad ka jingïatreilang hapdeng ki tnad. U la kubur ïa ka jingkyrshan jong ka PIB ha ka jingpynphriang ïa ki jingtip kiba ïadei bad ki kam jong ki bad u la ban jur ïa ka jingdonkam ban nang pynbun shuh shuh ïa kum kine ki jingïakren.
Ka Kong M. Blah, Assistant Professor bad Corporate Cell Coordinator jong ka NIFT Shillong, ka la kren shaphang ka jingtrei jong ka institute ha ka jingïatreilang bad ka Tnad Textiles na ka bynta ban kyntiew ïa ki kam shna jingshna tynrai bad ki kam thain jain. Ka la ai jingiaroh ia ka rynsan kaba plie lad ia ka lad pyniasoh bad ka la iasam ia ki jingeh kiba la iakynduh ha ka liang ka jingiakren bad ka la kyrpad ruh ban don ka jingkyrshan halor ka jingpynkhlain ia ka jingiatreilang bad ka PIB na ka bynta ka jingpynbna paidbah ha ki lad pathai khubor.
U Dr. Atiqur Rahman, Regional Director, na ka regional office jong ka Tnad ka koit ka khiah jong ka sorkar pdeng u la batai bniah halor ka bynta jong ka ophis ha kaba pynïaid bad khmih ïa ki prokram jong ka ri kiba iadei bad ka koit ka khiah ha ka jylla.
U la ong ba ka PIB ka don ka bynta kaba kongsan ha kaba pynphriang ia ki jingtip kiba iadei bad ka koit ka khiah, khamtam ha ka por ba don ki jingeh ha ka koit ka khiah jong ki paidbah, bad u la kren shaphang ki jingeh kum ka ktien bad ka jinglah ban ioh ia ki jingtip, kiba donkam ia ka jingkyrshan kaba iaibteng.
Ka B. Zoramthangi, Head of Programme, Akashvani Shillong, ka la kren shaphang ka jingdonkam jong ki lad pathai khubor ha kaba wanrah ia ka jingsngewthuh shaphang ki skhim bad ki prokram jong ka sorkar. Ka la ban jur ruh ïa ka bynta jong ka Akashvani ha kaba pynphriang ïa ki jingtip kiba ïadei bad ka koit ka khiah, ka jingpynrung kam ha ka tnad ïada ri, bad ki sienjam kiba iadei bad ki kynthei, bad ka la ban jur ba ka jingïatreilang kaba kham khraw hapdeng ki tnad kan ai jingmyntoi ïa ki paidbah.
U Hemango K. Dutta, Corporate Affairs & Public Relations, IIM Shillong, u la kren shaphang ka jingdonkam ban don ka jingïatreilang kaba kham iar bad ki lad pathai khubor ban kyntiew ïa ka jingïohi ïa ki kam jong ki jaka treikam. U la ban jur ia ka jingdonkam ban pynmih ia ki khubor ba man ka por bad ki prokram ba la pynshong nongrim ha ki jingthoh bad u la pynpaw ia ka jingdonkam ban pynsaphriang bad pynbna khubor kaba kham iar ha ki kot khubor jong ka ri, kynthup ia ki rynsan pathai khubor ha ka Hindi.
Ki nongmihkhmat na ka India Meteorological Department (IMD), u Rivertis Parong bad u Satyendra Kumar, ki la ïasam ïa ki jingshem jong ki halor ki jingeh ha kaba ïadei bad ka jingbatai lypa ïa ka jinglong ka suiñbneng ha kane ka thaiñ bad ki la ban jur ia ki sienjam kum ka Mission Mausam kaba thmu ban kyntiew ïa ka jingai jingshakri kiba iadei bad ka jinglong ka suiñbneng ha ka thaiñ Shatei Lammihngi. Ki la pdiang ruh ia ka bynta jong ka PIB ha kaba pynkhlain ia ka jingiakren bad ki sienjam ban pynsaphriang jingtip.
U nongmihkhmat na ka North Eastern Institute of Ayurveda & Homoeopathy, Tnad AYUSH u la kren shaphang ka jingbthah jong ka ban kyntiew ia ki rukom sumar tynrai bad ban ai ia ka jingsumar kaba lah ban ioh lyngba ka Ayurveda bad ki rukom sumar kiba iadei bad kane. Ki nongmihkhmat na ki regional office jong ka Science bad Technology ki la ban jur ia ka jingdon jong ki lad jingkyrshan ha kaba iadei bad ka teknoloji ha ka thain shatei lammihngi, kynthup ia ki sienjam wad bniah bad pynroi bad ki prokram ai jingtip kiba thmu ban kyntiew ia ka thain.
Ki nongmihkhmat na ka Directorate of Information and Public Relations (DIPR), Sorkar Meghalaya, Akashvani, North Eastern Institute of Ayurveda & Homeopathy (NEIAH), North East Centre for Technology Application and Reach (NECTAR), Soil and Water Conservation Department, ki nongtrei jong ka PIB bad CBC bad kiwei kiwei ki ophis jong ka sorkar ki la don lang ha kane ka sngi.
Ka jingialang ka la kut da ki jingiakren halor ki jingeh kiba la don lypa, ryngkat bad ki jingiakren kiba la pynsuk ia ka jingiadei bad kyntiew ia ka jingiatreilang bad pynkhlain ia ka jingiakren hapdeng ki nongiashim bynta.
