Jowai, Lber 30: Ka ophis jong ka PIB Shillong kala pynlong ia ka jingialang jong ki lad pathai khubor – ka Varta halor ka Viksit Bharat – Guarantee for Rozgar and Ajeevika Mission (Gramin) (VB – GRAM G) hapoh ka jingpeit jong ka Press Information Bureau (PIB), Shillong, ha ka jingiatreilang bad ki bor pyniaid District, Jowai bad ka Seng jong ki Nongthoh Khubor na ka thain Jaintia ban pynkhlain ia ka jingpynsngewthuh paidbah bad ka jingpynsaphriang jingtip ia ki sienjam ba iadei bad ka roi ka par ha ki jaka nongkyndong.
Haba ai jingkren ha ka jingialang, u Additional Director General, North East Zone, u Kripa Shankar Yadav u la ban jur ia ka bynta ba kongsan jong ki lad pathai khubor ban pyndap ia ka jingduna hapdeng ka sorkar bad ki nongshong shnong. U la ban jur ia ka jingdonkam ban don ka jingai jingtip kaba thikna bad kaba biang por ban pynthikna ia ka jingpynpoi ia ki skhim ha ak rukom kaba seisoh.
U la ong shuh shuh ba ka VB – GRAM G ka tei halor ki sienjam kiba la don lypa da kaba pynbeit ia ki jingduna lyngba ka jingpyniar ia ka jingpynthikna ha ka ioh kam ioh jam, ki rukom treikam kiba kham khlain, bad ka jingkyntiew ia ka jinglong kaba shai, kaba iahap bad ka jingthmu jong ka Viksit Bharat @2047.
Ka Kong Baiamtimon Blah, Additional Deputy Commissioner & Project Director (DRDA), West Jaintia Hills District, ka la batai bniah halor ka jingpyntreikam ïa kane ka skhim bad ki bynta ba kongsan. Ka la ong ba ka Aiñ ba thymmai ka pynkhlain ïa ka jingpynmih ia ki lad ioh kam, ka jinglong kaba shai, ka jingthmu, bad ka jingkitkhlieh, katba ka ithuh ïa ka jingdonkam jong ka jingthmu ba la ïalam da ka Shnong bad ka jingkitkhlieh lang hapdeng ka sorkar pdeng bad ki Jylla.
Ka la ban jur ba ka Viksit Bharat – Guarantee for Rozgar and Ajeevika Mission (Gramin) Act, 2025 ka pynïar ïa ka jingkular ban ioh kam haduh 125 sngi, ka kyntiew ïa ka kamai kajih, ka kyntiew ïa ka ïoh ka kot ha ka thaiñ, bad ka pynduna ïa ka jingwan buhai shnong.
Ka la kren ruh shaphang ki jingmyntoi ba kongsan kum ka jingsiew ia ka bainong ha ka por kaba biang, ka jingwanrah ia ki jingdon jingem kiba seisoh ha ki jaka nongkyndong, bad ka jingpyndonkam ia ki lad digital ban pynduna ia ka jingpynslem bad ka jingjah pisa, ban pynthikna ka jingpynpoi ia ki lad jingshakri kiba kham bha. Da kaba ban jur ïa ka jingai jinghikai, ka la ong ba ki nongshong shnong kiba don jingtip ki long kiba kongsan ha ka jingsynshar kaba don ka jingïashim bynta bad ba ki rynsan kum ka Varta ki ïarap ban pyndap ïa ki jingduna ha ka jingai jingtip.
Ka skhim ka kynthup ia ki kyndon ba kongsan kum ka jingkyntiew ia ka jingpynthikna ia ka jingsiew bainong, ka jingsiew ha ka por kaba biang, ka jingpynkhlain ia ki rukom peit bniah ha ka imlang sahlang, ka jingpyndonkam ia ki lad digital na ka bynta ka jinglong kaba shai, bad ka jingbuh hakhmat eh ia ki jingdon jingem ha ki jaka nongkyndong kiba khlain bad kiba lah ban ialeh pyrshah ia ka jingkylla ka suinbneng. Ka kyntiew ruh ia ka jingiatreilang bad kiwei pat ki prokram pynroi ha ki jaka nongkyndong bad ka jingiashim bynta kaba kham bun jong ki jaka treikam ha ka thain ha ka jingpynkhreh bad jingpyntreikam.
La ai ia ka jingkren kaba bniah halor ki bynta ba kongsan jong ka VB – GRAM G da ki ophisar jong ka District Rural Development Agency (DRDA), kiba la batai ia ki rukom pyntreikam bad ki jingmih kiba la khmih lynti ban ioh.
Ki Block Development Officer na ki C&RD Block jong ka Amlarem, Laskein, Thadlaskein, bad Namdong ki la ïasam ïa ki jingshem ha ka jaka treikam bad ki la kren shaphang ki kam ai jinghikai ba dang ïaid shakhmat ha kylleng ki shnong ban pynsngewthuh ïa ki paidbah shaphang ki skhim, ki hok, bad ki rukom pynkhreh kam ba ïashim bynta lang.
Ha ka jingïakren, ki nongthoh khubor bad ki nongmihkhmat na ka thaiñ ki la buh jingkylli halor ka jingsiew ïa ka bainong ha ka por kaba biang, ki lad ki lynti kiba shai, ka jingpynbeit ïa ki jingeh, bad ka jingïashim bynta jong ki paidbah. Ki heh sorkar ki la kren shaphang kine ki jingeh, da kaba ban jur ia ki jingiada, ka jingpeit bniah lyngba ki lad digital, bad ki sienjam ban kyntiew ia ka sap treikam na ka bynta ban pyntreikam kaba seisoh.
Ha kane ka jingïakren, u Assistant Director, PIB Shillong u Gopajit Das u la pyntip sha ki nongthoh khubor shaphang ka Journalists Welfare Scheme jong ka PIB bad u la kyntu ïa ki ban shim ïa ki jingmyntoi bad ki lad jingkyrshan kiba don hapoh kane ka skhim, katkum bad ha ka por ba donkam. La iakren shuh shuh ba yn pyrshang ban pynthikna ia ka jingai bynta lang ia baroh ki nongthoh khubor na kylleng ki district jong ka Meghalaya ha ki sienjam jong ka PIB, kynthup ia ki press tour bad ki prokram pynphriang khubor, ki bym sahkut tang ha ka nongbah Shillong, khnang ban kyntiew ia ka jingmihkhmat kaba ryntih bad ban pynkhlain ia ka jingiadei bad ki lad pathai khubor ha ki jaka nongkyndong ha kylleng ka jylla.
Ki nongthoh khubor na Jowai bad Khliehriat, ryngkat ki nongmihkhmat na ka Directorate of Information and Public Relations (DIPR), Jowai bad Khliehriat, ki nongmihkhmat na ka Synjuk ki Waheh Chnong, bad ki dkhot ka SHG kiba hap hapoh ka National Rural Livelihoods Mission (NRLM) ki la ïashim bynta shitrhem ha kane ka jingïalang.
Ka prokram ka la kut da ka jingkular lang ban pynkhlain ia ka jingiakren kaba iatrei lang bad ban kyntiew ia ka jingpynsaphriang jingtip shaphang ka VB–GRAM G na ka bynta ka roi ka par ha ki jaka nongkyndong kaba ai bynta lang
