Shillong, Lber 31: Ka Seng Khasi Kmie, myntan ka sngi, ka la lah ban pynlong ia ka lehniam Pynkiew Ksing bad Sei Ksing, kaba long kum shi bynta ka byrta ka shula sha la ki parakur parakha sawdong ka bri Hynñiewtrep, ba ka samoi jong ka shad ka kmen kane ka la wan ba kan poi, ha kaba u khun bynriew, kum shi bynta ban ainguh ia U BLei Trai Kynrad, ba un pynkhreh ban hiar lympung shad ban pyndep ia ka Shad Suk Mynsiem.
Mynta ka kynti ka Shad Suk Mynsiem kan long ha ki lai sngi katta ha ka 11, ka 12 bad ka 13 tarik u Ïaiong 2026. Ka jingpyndep ia kane ka lehniam kiew ksing ka la long hakhmat ka hall ka Seng Khasi Kmie, kaba don ha Mawkhar Shillong, ha kaba la pyndep ia ka nguh ka dem ka shat ka kheiñ ka khnong ka bishar da ka kynhun u Riew Tymmen Riewsan ka Seng Khasi hapoh ka jingialam u Rgh Donbokstar Kurkalang.
Shwa ban leit sha ka nguh ka dem, la ioh ia ka jingkren pdiang sngewbha ba la ai da u vice president Seng Khasi Kmie Rgh D.L Nongbri, bynrap sa ka jingkren na u President Seng Khasi Kmie u Rgh O.Pyngrope.
Hadien ba la dep ka nguh ka dem, ka kynhun ki duhalia ba dei na ka kynhun ‘La Syrdoh’ ki la shim ia ka bynta ban tem ia baroh ki 7 tylli ki skit hakaba dei artad kane ka kynhun kaban tem ban put ha kane ka shad mynta ka snem.
Hadien kane, la ioh pat ia ki kyntien ai khublei ba la ai da u Cultural Secretary Seng Khasi Kmie, Rgh Hamar S Kharhmar.
La wan ban sakhi bad pynshIt pynshngain ia kane ka sngi da ki dkhot ka Jylli Pyrkhat Kam (JPK) Seng Khasi Kmie, ki dkhot ka Seng Kynthei, ki parakur ki parakha bad ki khun samla.
Dei naduh kane ka sngi ba la dep ban Pynkiew Ksing/Sei Ksing, ba ka Seng Khasi man la ka janmiet kan pynlong ia ka jinghikai bad batai shaphang ka shad suk mynsiem , kaban iai bteng ter ter tad haduh bn da poi sha ka sngi ban hiar lympung ban pyndep ia ki lai sngi jong ka shad.
