Shillong, Iaiong 03: Ka Khasi Students’ Union ka khot ka ïa wer ia baroh ki paid ka Bri Hynniewtrep Hynn̈iewskum Hynn̈iaw-wasa Hynn̈iaw-Wasum ban don ryngkat lang ha ka jingïaid kjat ha 4 tarik u Ïaiong, 2026 kaba dei Ka Sngi Kyrsiew Ri lane ka Khasi National Awkening Day.
Ka Seng ka ju rakhe ïa kane ka sngi kyrpang ban pynkynmaw ïa ki paradoh parasnam ba ha ka spah snem kaba khatkhyndai (19th Century) kata ha ka 4 tarik u Ïaiong, la khie ka thma kaba jur hapdeng ka Sorkar Bilat (East India Company) bad ki Hima Khasi hapoh ka jinglam khmat jong ka Hima Khadsawphra kaba la synshar da u Pa’iem Tirot Sing Syiem bad la tip ïa kane ka thma kum ka 1st Anglo-Khasi War da ka pyrthei bad ka long ka thma kaba shyrkhei bad kaba la neh slem bha ha ka juk jong u Khasi.
Ka Seng ka shim ïa kane ka sngi kum ka sngi kyrpang ban kyrsiew ïa la ka Jaidbynriew kaba dang ïaleh pyrshah ïa ki bun jait ki thma kiba jar jar kiba wan ban bam kruin ïa ka Jaidbynriew.
Ka jingïaid paidbah kan sdang na Bharat Scouts bad Guides, Laban bad yn pynkut ha Shillong Vidyalaya Secondary School, Lumshatsngi naduh Ka por ka long 1 baje noh phaisngi.
