Shillong, Iaiong 21: U myntri rangbah ka jylla u Conrad K. Sangma haba kren ha ka jingrakhie ia ka Jubili Rupa ka Montfort Teacher’s Training College kaba don ha Danakgre Tura u la ong ba donkam ia ka jingkylla ha ka imlang ka sahlang ha ka jylla ha ka ri bad ha ka pyrthei hi baroh bad kata ka jingkylla kan long ha ka pyrkhat ka pyrdain.
Haba kren kum u kongsan ha kane ka Jubili Rupa u la ong ba kane ka jingkylla ka I kumba ka suk bha hynrei ka dei pat ka jingkylla kaba dondor haduh katta katta namar kiba bun ki niew ia kane ka jinghikai kaba long kyrpang kum ka jingkit kaba khia hynrei ka Montfort kala shim ia kane ka kabu ban ai ka jingshakri bad wanrah ia ka jingkylla.
U la ong ba ia kane ka skul la plie Ar phew San snem mynshuwa da u Pyrno A. Sangma bam kwai ha Dwar u Blei bad kum kane ka jaka ai jinghikai kala long ka jaka hikai kaba nyngkong tam ha ka thain shatei lam mihngi baroh kawei, bad kam dei kaba suk ban ai ka jingshakri ha kine ki Ar phew San snem wat hapdeng ki jingeh kiba bun bad kum kine ki jaka ai jinghikai mynta kila don kylleng kylleng ha ka thain shatei lam mihngi.
Ha kane ka sngi u myntri rangbah u la kren ruh shaphang ka skhim ba ka sorkar kala pyntrei kam kaba la tip kum ka MOTHERS bad kane ka long ban wanrah ia ka Koit ka khiah, ka Roi ka par, ka Pule ka puthi ha ki nongkyndong da ka jingiatrei lang ka tnad Pule puthi, ka tnad Pynroi Nongkyndong bad ka tnad Social Welfare.
Ha ka jingkren u Rev. Bro Dr. Maria Soosai bad u Rev. Bro Dr. V.K George u la ong ba kane ka Montfort kala sdang ha u snem 1995 bad bud sa ka jinghikai kaba kyrpang ia ki khynnah kiba don ka jingduna ha ki dkhot met ha u snem 1996 hynrei dei ha u snem 1999 la sdang ban seng ia ka Montfort Teacher’s Training College for Special Education.
Haduh u snem 2024 la ai jinghikai ia 600 ngut kum ki Special Educaton Teachers bad mynta ki don 200 ngut ki khynnah skul kiba don ia ka jingduna ha ki dkhot met kiba ia pule lang bad 1000 ngut kiwei pat ki khynnah skul.
