Shillong, Iaiong 21: Mynta ka sngi 21/Iaiong/2026 ki nonghikai bad ki nongtrei ha ki ophis jong ki skul bad ki kolej kiba ioh ia ka jingsiew tulop na ka sorkar kila kyntait mardor ia ka Skhim Meghalaya Non- Government School, Colleges Employees Centralise Provident Fund Scheme 2026 ba la pynbna da u myntri rangbah ha ka 1 tarik mynta u bnai.
Haba ia dei bad kane u bah Boswell Pala president Ka Khasi Jaintia Deficit School Association haba kren ha ki lat pathai khubor ha Shillong Press Club u la ong ba hadien ka jingiakynduh lang jong ki seng nonghikai bad ki bym dei ki nonghikai kila shim ia ka rai ban kyntait mardor ia kane ka skhim kaba la rai da ka sorkar ban ai sha ki nonghikai bad bym dei nonghikai ha ki skul kiba ioh ia ka jingiarap na ka sorkar.
Wat hapdeng ka jingthoh kaba kila dep phah sha ka tnad pule puthi ban pyrshah ia kane, hynrei ka long kaba sngewsih ba ka sorkar kala iaid sha khmat ban pyntrei kam ia ka skhim kaba kila kyntait jong u snem 2026, u la ong ba ka jingpyntrei kam jubor ka sorkar ia kane ka skhim ban ioh baibam ki nonghikai bad ki bym dei ki nonghikai mynta ka dang sah ha ka jingbishar hapoh iing kashari.
Wat hapdeng jong kane ka tnad pule puthi kala pynmih ia ka jingpynbna ba baroh ki nonghikai kiba la shongthait bad kiba dang hikai ba kin plie noh ia ka Pran Account ia baroh ha ka jylla Meghalaya kiba hap hapoh ki Deficit School. Ia kane ka rai ban ai ia kane ka skhim ka sorkar kala shim ha ka 1/Iaiong/2026.
