Shillong, Iaiong 21: ka kynhun ialehkai ka Langsning FC ka la hap ba kan da jaw bad syep bad syar ha shwa ba kan lah ban pynliem noh ia ka Lawbah SC da 5-3, ha ka lympung ialehkai jong ka 5th Meghalaya State League, ba la pyniaid ia ka da ka Meghalaya Football Association, ba la long ha kiba bun tylli ki jaka kiba don hapoh ka jylla.
Haba phai shaka jingiakhun kaba la long ha Mairang, kaba dei naka bynta ka Group F, ka Langsning FC ka la hap ba kan iakhun tyngeh hadien ba u Nelsson Rymbai (7′, 10′, 88′) u la lam khmat ban thep ia ki lai tylli ki kol, kaba hangne u rang ialehkai ka Lawbah SC u Adonydevy Riwan (19′, 45’+1, 89′), u la lah lem ban lam khmat ia ka kynhun ban thep ia ki lai tylli ki kol.
Hynrei ki kol ba la thep pat sa da u Dajiedlang Wanshnong (33′) Bad Chusrang Sangma (42′) ka la biang pura ia ka Langsning FC ba kan jop ia kane ka jingiakhun.
Ka khubor na ka jingiakhun ka Group A pat ka long ba ka kynhun ialehkai ka Khimusniang SC, ka la ieng iakhun tyngeh hadien ba ka la shah tam shwa shakhmat da shi kol ba kan lah ba kan pynliem ia ka Mawshun SC da 3-1.
Katba ka resol na ka jingiakhun jong ka Group B pat ka long ba ka kynhun ialehkai jong ka Mawlum Tyrsad S&CC ka la lah ba kan pynliem noh ia ka Mulang SC Nongbah da 4-2.
Ka khubor na ka jingiakhun jong ka Group C pat ka long ba ka jingialehkai hapdeng ka Amlarem SC pyrshah ia ka Laskein S&CSC ka la kut noh ha ka jingiakhaid bym shim la don satia mano mano ba lah ban ia pynkhih ia ka jar bad kum kane ka juh ka resol ka la mih paw ruh na ka jingiakhun ka Group D bala iakhun hapdeng ka Shkenshynriah SC bad ka Thangskai Tiger SC, kaba la kut ha ka jingiakhaid bym shim la don ba ioh pynkhih ia ka jar.
Ka jingiakhun ha Williamnagar kaba dei naka bynta k Group G, ka lynti iaid ia ka kynhun ka Maram FC ban khur ia ka nam jop ka la poi sha ka jingshah khanglad noh hakhmat ka kynhun ialehkai ka Janepih YSCA kaba la jop ia kane ka jingiakhun da 3-0, ia kin eki kol la thep ia ki da Edyson Iawphniaw (26′), Alphascius Sangriang (30′) bad Wankuparlang Khardiengngan (65′).
Katba ka kynhun ialehkai ka Mawten SC ka la lah ba kan pynliem noh ia ka Mawlarshong SC 3-1, haka jingiakhun kaba dei jong ka Group H ba la long ha Mawkyrwat, kaba hangne u Charles Lyngdoh u la rung lem ka nam kyrteng ka jong u sa kum uwei pat u player ban ioh thep sted ia ka kol ha kane ka lympung kaba la wan tang hapoh lai minit ba la sdang ia ka.
Lashai pat ka sngi, yn don tang kawei ka jingiakhun kaba dei jong ka Group G ha Williamnagar ha kaba ka Attong Matgrik FC kan mih madan ban iakhun pyrshah ia ka Balmanduri FC kaban long ha ka por 3 baje nohphai sngi.
